આજે 12 ઓક્ટોબર, સોમવારના રોજ ગુજરાત અને દેશભરમાંથી મહત્વના સમાચાર સામે આવ્યા છે. ગાંધીનગરમાં કોંગ્રેસ ધારાસભ્ય સામે ફરિયાદ નોંધાઈ છે, તો વડોદરામાં મોટી ચોરીની ઘટના બની છે. આ ઉપરાંત દેશની રાજકીય અને કાનૂની ઘટનાઓમાં પણ મહત્વના વળાંક આવ્યા છે.
ગાંધીનગર: કોંગ્રેસ ધારાસભ્ય જીગ્નેશ મેવાણી સામે પોલીસ ફરિયાદ
ગાંધીનગર મહાનગરપાલિકાની ચૂંટણી દરમિયાન થયેલા હોબાળાના મામલે કોંગ્રેસના ધારાસભ્ય જીગ્નેશ મેવાણી સામે પેથાપુર પોલીસ સ્ટેશનમાં ફરિયાદ નોંધાઈ છે. પેથાપુર પોલીસ સ્ટેશનના પીઆઈ એ.એમ. દેસાઈએ ફરિયાદ નોંધાવી છે. મેવાણી પર પોલીસ સ્ટેશનમાં હોબાળો કરવો, અભદ્ર વ્યવહાર કરવો, ભડકાઉ ભાષણ આપવું અને શાંતિ ડહોળવાનો પ્રયાસ કરવાનો આરોપ છે.
ગાંધીનગર મનપાની ચૂંટણી દરમિયાન કોંગ્રેસના ઉમેદવાર યુસુફ પરમારની અટકાયત કરવામાં આવી હતી. આ ઘટનાના વિરોધમાં જીગ્નેશ મેવાણી સહિત 20થી વધુ લોકો પેથાપુર પોલીસ સ્ટેશન પહોંચ્યા હતા, જ્યાં હોબાળો થયો હોવાનો આક્ષેપ છે. આ મામલે પોલીસની ફરિયાદ બાદ રાજકીય વર્તુળોમાં ચર્ચા શરૂ થઈ છે.
વડોદરા: કારનો કાચ તોડી 35 લાખની ચોરી, હેલ્મેટ પહેરેલા તસ્કરો ફરાર
વડોદરામાં દેણા ચોકડી પાસે કારનો કાચ તોડીને 35 લાખ રૂપિયાની રોકડની ચોરીની ઘટના સામે આવી છે. હાલોલથી વડોદરા આવી રહેલા એક કન્સ્ટ્રક્શન કંપનીના એન્જિનિયર આ ચોરીનો ભોગ બન્યા હતા. એન્જિનિયરે ચા-પાણી માટે કાર પાર્ક કરી હતી ત્યારે હેલ્મેટ પહેરીને આવેલા તસ્કરોએ કારનો કાચ તોડ્યો અને રોકડ ભરેલી બેગ લઈને ફરાર થઈ ગયા.
બેગમાં નમો આંગડિયા પેઢીમાંથી ઉપાડેલા 30 લાખ રૂપિયા તથા અગાઉની ઉઘરાણીના 5 લાખ રૂપિયા સહિત કુલ 35 લાખની રોકડ હતી. આ રકમ કંપનીના કર્મચારીઓના પગાર અને સપ્લાયરોને પેમેન્ટ કરવા માટે હતી. ચોરીની ઘટના સીસીટીવીમાં કેદ થઈ છે. પોલીસે ફૂટેજના આધારે તપાસ શરૂ કરી છે.
અમદાવાદ: મેડ સંધુ હત્યા કેસમાં ત્રણ આરોપીની ધરપકડ, ગુજરાત ATSનું સંયુક્ત ઓપરેશન
પંજાબના અમૃતસરમાં થયેલા મેડ સંધુ હત્યા કેસમાં ગુજરાત ATS અને વલસાડ SOGને મોટી સફળતા મળી છે. બંને એજન્સીઓએ સંયુક્ત ઓપરેશન હાથ ધરીને હત્યા કેસમાં સંડોવાયેલા ત્રણ આરોપીઓની ધરપકડ કરી છે. ગુજરાત ATSએ ત્રણેય આરોપીઓને પંજાબ પોલીસને સોંપી દીધા છે.
ઉલ્લેખનીય છે કે અમૃતસરમાં કાર વોશિંગ સેન્ટર નજીક મેડ સંધુની હત્યા કરવામાં આવી હતી. આ કેસમાં અગાઉ ક્રાઇમ બ્રાન્ચ દ્વારા આરોપી શૂટરની પણ ધરપકડ કરવામાં આવી હતી. હવે ગુજરાત ATS અને વલસાડ SOGની સંયુક્ત કાર્યવાહીથી તપાસમાં વધુ મહત્વની કડી મળી શકે છે.
CEC વિવાદ: વિપક્ષી નેતાઓને મળવાનો CJI સૂર્યકાંતનો ઇનકાર, રાહુલ ગાંધીની સુપ્રીમ કોર્ટ તરફ કૂચની જાહેરાત
ચૂંટણી પંચ અને મુખ્ય ચૂંટણી કમિશનર (CEC) સંબંધિત વિવાદ વચ્ચે વિપક્ષી ગઠબંધનને ઝટકો લાગ્યો છે. ચીફ જસ્ટિસ ઑફ ઇન્ડિયા (CJI) સૂર્યકાંતે વિપક્ષી નેતાઓના પ્રતિનિધિમંડળને મળવાનો ઇનકાર કર્યો છે. કોંગ્રેસ નેતા રાહુલ ગાંધીએ CJIને મળવા માટે સુપ્રીમ કોર્ટ તરફ કૂચ કરવાની જાહેરાત કરી છે.
CJI સૂર્યકાંતે સ્પષ્ટતા કરી હતી કે સુપ્રીમ કોર્ટ પાસે વહીવટી સ્તરે કોઈ રાજકીય પક્ષના પ્રતિનિધિમંડળને મળવાની સત્તા નથી. પ્રતિનિધિમંડળ જે મુદ્દાઓ પર ચર્ચા કરવા માગે છે તે કોર્ટમાં પહેલેથી જ વિચારાધીન છે. તેમણે વધુમાં જણાવ્યું કે સુપ્રીમ કોર્ટની શક્તિ અરજી દાખલ થયા બાદ તેની સુનાવણી કરીને ચુકાદો આપવાની છે. તેમણે ભારપૂર્વક કહ્યું કે સુપ્રીમ કોર્ટના દરવાજા તમામ નાગરિકો માટે 24 કલાક ખુલ્લા છે અને અદાલત દરેક નાગરિકના મૂળભૂત અધિકારોની રક્ષા માટે પ્રતિબદ્ધ છે.