ગુજરાતમાં છેલ્લા 24 કલાકમાં રાજ્યના 32 જિલ્લાના 151 તાલુકામાં વરસાદ નોંધાયો છે. ગુરુવાર સવારના 6 વાગ્યાથી શુક્રવાર સવારના 6 વાગ્યા સુધીના આ આંકડા છે. આ સમયગાળામાં સૌથી વધુ વરસાદ મોરબી જિલ્લાના માળિયા તાલુકામાં 131 મીમી નોંધાયો છે.
રાજ્યમાં ચાલુ ચોમાસામાં અત્યાર સુધીમાં સરેરાશ 85.79 ટકા વરસાદ થઈ ચૂક્યો છે. સપ્ટેમ્બર મહિનામાં અત્યાર સુધીમાં 94 ટકા વરસાદ નોંધાયો છે. દક્ષિણ ગુજરાતમાં સૌથી વધુ 112 ટકા વરસાદ થયો છે.
ઝોન પ્રમાણે જોઈએ તો કચ્છમાં 57 ટકા, ઉત્તર ગુજરાતમાં 66 ટકા, મધ્ય પૂર્વ ગુજરાતમાં 85 ટકા, સૌરાષ્ટ્રમાં 66 ટકા અને દક્ષિણ ગુજરાતમાં 112 ટકા વરસાદ નોંધાયો છે. આ આંકડા પ્રમાણે દક્ષિણ ગુજરાતમાં સિઝનનો વરસાદ સામાન્ય કરતાં વધુ રહ્યો છે, જ્યારે કેટલાક વિસ્તારોમાં હજુ વરસાદની ઘટ છે.
તાલુકાવાર સ્થિતિ જોઈએ તો 5થી 10 ઈંચ વરસાદ 13 તાલુકામાં, 10થી 20 ઈંચ વરસાદ 80 તાલુકામાં અને 20થી 40 ઈંચ વરસાદ 131 તાલુકામાં નોંધાયો છે. રાજ્યના 44 તાલુકામાં 40 ઈંચથી વધુ વરસાદ થઈ ચૂક્યો છે.
સપ્ટેમ્બર મહિનામાં પણ રાજ્યના અનેક વિસ્તારોમાં વરસાદી માહોલ ચાલુ છે. સરદાર સરોવર નર્મદા બંધ સહિત રાજ્યના અનેક બંધમાં નવા પાણીનો સંગ્રહ થયો છે.