ગુજરાતમાં શનિવારથી ભારે વરસાદની આગાહી હવામાન વિભાગે કરી છે. અમરેલીના ખાંભા-ગીર પંથકમાં ગઈકાલે વરસાદી ઝાપટાં પડ્યાં હતાં. 12 સપ્ટેમ્બરથી રાજ્યમાં ધોધમાર વરસાદની શક્યતા છે.
અમદાવાદમાં વિધાનસભા, ગાંધીનગર કોર્ટ અને અમદાવાદની ત્રણ શાળાઓને બોમ્બથી ઉડાવવાની ધમકી મળી હતી. 'ગુજરાત બોલશે ખાલિસ્તાન ઝિંદાબાદ' લખેલો ઈમેલ બપોરે 1:11 વાગ્યે શાળાઓને અને 2:11 વાગ્યે કોર્ટને મોકલવામાં આવ્યો હતો. પોલીસે તપાસ કરતાં કોઈ શંકાસ્પદ વસ્તુ મળી નથી.
વિધાનસભાના ચોમાસુ સત્રના બીજા દિવસે કોંગ્રેસી ધારાસભ્ય ઈમરાન ખેડાવાલા સામે 'વંદે માતરમ' મુદ્દે શિસ્તભંગની કાર્યવાહીની માંગ ઉઠી હતી. જવાબમાં મેવાણીએ કહ્યું કે કોંગ્રેસે વંદે માતરમ્ ગાતા ગાતા પીઠ પર દંડા અને છાતી પર ગોળી ખાધી છે.
લઠ્ઠાકાંડ મુદ્દે અમિત ચાવડાએ સરકારને ઘેરતા કહ્યું કે રાજ્ય ઉડતા ગુજરાત બની ગયું છે. વારંવાર લઠ્ઠાકાંડ થાય છે અને ગૃહમંત્રી રીલ બનાવે છે.
રાજકોટ લોધિકા સંઘની ચૂંટણીના પરિણામો બાદ ભાજપમાં રાદડિયા અને કોરાટ જૂથ વચ્ચે જંગ શરૂ થયો છે. વિજય સખીયાએ જિલ્લા પ્રમુખ અલ્પેશ ઢોલરીયા પર નિશાન સાધીને પૂછ્યું કે ઢોલરીયાએ કોની સાથે આર્થિક વ્યવહાર કર્યો છે.
રૂ. 635 કરોડની લૂંટના માસ્ટર માઈન્ડ ધવલ પટેલ સામે લુકઆઉટ નોટિસ જાહેર કરવામાં આવી છે. બાકીના છ આરોપીઓની ધરપકડ કરવામાં આવી છે.
ભારતના મુખ્ય ચૂંટણી કમિશનર જ્ઞાનેશ કુમાર બે દિવસની ગુજરાત મુલાકાતે આવ્યા છે. તેમણે કહ્યું કે ગાંધી અને સરદારની ભૂમિ ગુજરાતની ધરતી પર આવીને ગર્વ થાય છે.
ગીર સોમનાથના ઉના ડેપોમાં એક ડ્રાઈવરે દારુની ડિલિવરી લેતો વીડિયો વાયરલ થયો છે. ડ્રાઈવરનો આલ્કોહોલ ટેસ્ટ પોઝિટિવ આવતાં તેની સામે કેસ કરવામાં આવ્યો છે.
રાજ્યમાં પાંચ વર્ષમાં પોક્સોના 16 આરોપીઓને ફાંસીની સજા અને 908 આરોપીઓને આજીવન કેદની સજા થઈ છે. 2022થી 2026 દરમિયાન 1,785 ચુકાદા આવ્યા છે. ઓગસ્ટમાં 48 આરોપીઓને સજા થઈ હતી. કલોલમાં 72 કલાકમાં ચાર્જશીટ બાદ આજીવન કેદની સજા કરાઈ હતી.
ગોંડલના પ્રખ્યાત લોકમેળામાં 600 લોકોની હાજરીમાં હત્યા થઈ છે. ફોટો ફ્રેમના સ્ટોલ પર ભાવતાલ બાબતે બબાલ થતાં એક સ્ટોલ ચાલકને છરી મારી દેવામાં આવી હતી, જ્યારે એક અન્ય ગંભીર રીતે ઈજાગ્રસ્ત થયો છે.