ગુજરાતમાં આજે સવારથી વરસાદ શરૂ થયો છે. ગાંધીનગરના સ્ટેટ ઇમરજન્સી ઓપરેશન સેન્ટરના આંકડા મુજબ, સવારે 6 થી બપોરે 12 વાગ્યા સુધીના છ કલાકમાં રાજ્યના 126 તાલુકામાં વરસાદ નોંધાયો છે. દક્ષિણ ગુજરાત અને સૌરાષ્ટ્રના કેટલાક ભાગોમાં સારો વરસાદ થયો છે, જેનાથી વાતાવરણમાં ઠંડક પ્રસરી છે.
અમદાવાદમાં પણ આજે સારો વરસાદ વરસી રહ્યો છે. શહેરમાં યલો એલર્ટ જાહેર કરાયું હતું. એસજી હાઇવે, મકરબા, જુહાપુરા, સરખેજ અને આનંદનગર સહિતના વિસ્તારોમાં વરસાદ થયો છે.
સૌથી વધુ વરસાદ નવસારી જિલ્લાના વાંસદા તાલુકામાં 2.95 ઈંચ નોંધાયો છે. સુરતના અંબિકા વિસ્તારમાં 2.60 ઈંચ અને નર્મદા જિલ્લાના ગરૂડેશ્વર તાલુકામાં 2.24 ઈંચ વરસાદ પડ્યો છે. આ વિસ્તારોમાં વરસાદથી નદી-નાળાઓ અને જળાશયોમાં પાણીની આવક થઈ છે, જે ખેડૂતો માટે રાહતરૂપ છે.
દક્ષિણ ગુજરાતમાં નર્મદાના ડેડિયાપાડામાં 2.05 ઈંચ, નવસારી શહેરમાં 2.05 ઈંચ, વલસાડના ધરમપુરમાં 1.85 ઈંચ અને વાપીમાં 1.73 ઈંચ વરસાદ નોંધાયો છે. ભરૂચના વાગરા તાલુકામાં 1.57 ઈંચ અને તાપીના ડોલવણમાં 1.42 ઈંચ વરસાદ પડ્યો છે.
ડાંગ, કપરાડા, નાસવાડી, નાનાપોંઢા, લિલીયા, ઉમરપાડા અને સાગબારા સહિતના તાલુકાઓમાં 1.00 ઈંચથી 1.35 ઈંચ સુધીનો વરસાદ નોંધાયો છે. રાજ્યના બાકીના ભાગોમાં પણ હળવાથી મધ્યમ વરસાદ ચાલુ છે, જેનાથી ચોમાસાનો માહોલ મજબૂત બન્યો છે.