ગુજરાતમાં રાજકીય પક્ષોને મળતા દાન અંગે એક મહત્વપૂર્ણ માહિતી સામે આવી છે. રાજ્યના છ નાના રાજકીય પક્ષોને છેલ્લા પાંચ વર્ષમાં કુલ 2692 કરોડ રૂપિયાનું દાન મળ્યું છે. આ પક્ષો ચૂંટણીમાં લડ્યા હોવા છતાં તેમને મળેલા મતોની સંખ્યા ખૂબ જ ઓછી છે.
એસોસિએશન ફોર ડેમોક્રેટિક રિફોર્મ્સ (ADR)ના અહેવાલ મુજબ, ભારતીય રાષ્ટ્રીય જનતાદળને 1156 કરોડ રૂપિયા, ન્યુ ઈન્ડિયા યુનાઈટેડ પાર્ટીને 699 કરોડ રૂપિયા, સ્વતંત્ર અભિવ્યક્તિ પાર્ટીને 75 કરોડ રૂપિયા, સત્યવાદી રક્ષક પાર્ટીને 416 કરોડ રૂપિયા, સૌરાષ્ટ્ર જનતા પક્ષને 211 કરોડ રૂપિયા અને જનમન પાર્ટીને 133 કરોડ રૂપિયાનું દાન મળ્યું છે.
આ પક્ષોએ લોકસભા અને વિધાનસભાની ચૂંટણીઓમાં ઉમેદવારો ઉભા રાખ્યા હતા, પરંતુ તેમનો ચૂંટણી ખર્ચ શંકાસ્પદ જણાય છે. લાઉડસ્પીકર, બેનર અને રેલી પાછળ 20 થી 90 કરોડ રૂપિયાનો ખર્ચ દર્શાવવામાં આવ્યો છે, જે અવાસ્તવિક લાગે છે. આ ઉપરાંત, આ પક્ષોએ ચૂંટણીમાં એક પણ બેઠક જીતી નથી.
ઉદાહરણ તરીકે, સત્યવાદી રક્ષક પાર્ટીએ 2024ની ચૂંટણીમાં માત્ર 2 બેઠકો પર ચૂંટણી લડીને 1042 મત મેળવ્યા હતા, તેમ છતાં તેને 416 કરોડ રૂપિયાનું દાન મળ્યું. સૌરાષ્ટ્ર જનતા પક્ષને પાંચ ચૂંટણીમાં માત્ર 140 મત મળ્યા હોવા છતાં 211 કરોડ રૂપિયાનું દાન મળ્યું છે.
દેશભરમાં નાના રાજકીય પક્ષોને મળેલા કુલ દાનમાંથી 70 ટકા હિસ્સો ગુજરાતના આ છ પક્ષોને મળ્યો છે. આ મામલે CID ક્રાઈમ તપાસ કરી રહી છે. આશંકા છે કે રાજકીય પક્ષોને મળતી કરમુક્તિનો દુરુપાયોગ કરીને મની લોન્ડરિંગ અને ટેક્સ ચોરી કરવામાં આવી રહી છે.