ગુજરાતમાં ચોમાસું હવે પોતાની વિદાયની તૈયારીમાં છે. હવામાન વિભાગના જણાવ્યા અનુસાર, આગામી 24 કલાકમાં દક્ષિણ-પશ્ચિમ ચોમાસું રાજ્યના મોટા ભાગના વિસ્તારોમાંથી વિદાય લઈ શકે છે. ચોમાસાની વાપસીની રેખા હાલ ડીસા અને નલિયા પરથી પસાર થઈ રહી છે, જેના કારણે વિદાયની સ્થિતિ અનુકૂળ બની છે.
છેલ્લા 24 કલાકમાં સૌરાષ્ટ્રના છૂટાછવાયા વિસ્તારો સિવાય સમગ્ર ગુજરાત અને કચ્છમાં હવામાન મુખ્યત્વે સૂકું રહ્યું છે. વરસાદ ન થવાને કારણે ભાદરવાનો તાપ લોકોને હેરાન કરી રહ્યો છે. બે દિવસમાં રાજ્યના મહત્તમ તાપમાનમાં 2 ડિગ્રી સેલ્સિયસનો વધારો નોંધાયો છે.
હવામાન વિભાગે આગામી સાત દિવસ દીવ, દમણ અને દાદરા નગર હવેલી સહિત રાજ્યના તમામ જિલ્લાઓમાં હવામાન સંપૂર્ણપણે સૂકું રહેવાની શક્યતા વ્યક્ત કરી છે. આ સમયગાળામાં ભારે વરસાદની કોઈ આગાહી નથી.
આ ચોમાસાની સીઝનમાં અત્યાર સુધી રાજ્યમાં સરેરાશ 11 ટકા વરસાદની ઘટ નોંધાઈ છે. સૌરાષ્ટ્ર અને કચ્છમાં 24 ટકા વરસાદની ઘટ છે. ચોમાસાની વિદાય સાથે વરસાદની શક્યતાઓ ઘટી રહી છે અને હવામાન ધીમે ધીમે સૂકું બની રહ્યું છે.
હવામાન વિભાગના વૈજ્ઞાનિક રામાશ્રય યાદવના જણાવ્યા મુજબ, હાલમાં અલ-નીનોની મજબૂત સિસ્ટમ સક્રિય છે, જેની અસર વર્ષના અંત સુધી રહી શકે છે. તેના કારણે ઓક્ટોબર મહિનામાં તાપમાન સામાન્ય કરતાં વધુ રહેવાની શક્યતા છે. એટલે કે, ચોમાસા બાદ ઓક્ટોબરમાં ગરમી સામાન્ય કરતાં વધુ અનુભવાઈ શકે છે. રાજ્યમાં આગામી એક અઠવાડિયા સુધી મહત્તમ અને ન્યૂનતમ તાપમાનમાં મોટા ફેરફારની સંભાવના નથી.
રાજ્યના મુખ્ય શહેરોમાં ગરમીનો પારો સતત વધી રહ્યો છે. 1 ઓક્ટોબરે કંડલા એરપોર્ટ 37.8°C સાથે રાજ્યનું સૌથી ગરમ સ્થળ હતું. 2 ઓક્ટોબરે ભૂજ અને ડીસામાં તાપમાન 38.6°Cએ પહોંચ્યું, જે આ બંને શહેરોને સૌથી ગરમ બનાવે છે. તે જ દિવસે રાજકોટ અને સુરેન્દ્રનગરમાં 37.8°C નોંધાયું.
મધ્ય અને દક્ષિણ ગુજરાતના શહેરોમાં પણ ગરમીમાં ઉછાળો જોવા મળ્યો. અમદાવાદનું તાપમાન 36.0°Cથી વધીને 37.0°C, વડોદરાનું 35.8°Cથી 37.2°C, ગાંધીનગરનું 35.4°Cથી 36.5°C અને સુરતનું 35.4°Cથી 36.8°C નોંધાયું. દરિયાકાંઠાના અને સૌરાષ્ટ્રના વિસ્તારોમાં પણ તાપમાન વધ્યું છે, જે દર્શાવે છે કે ઓક્ટોબરના પ્રારંભે સમગ્ર રાજ્યમાં ગરમીનું પ્રમાણ વધ્યું છે.