ગુજરાત સરકારે 1 ઓક્ટોબર, 2026થી સમગ્ર રાજ્યમાં ESIC (કર્મચારી રાજ્ય વીમા યોજના)નો વ્યાપક અમલ કરવાનો નિર્ણય લીધો છે. આ નિર્ણયથી રાજ્યના તમામ 31 જિલ્લાઓ આવરી લેવાશે અને 8થી 10 લાખ નવા શ્રમિકોને સીધો આરોગ્ય લાભ મળશે.
હાલમાં ESIC યોજના 16 જિલ્લાઓમાં અંશતઃ અમલમાં છે, જ્યારે 15 જિલ્લાઓમાં તેનો અમલ થતો નથી. નવા નિર્ણયથી આ તમામ જિલ્લાઓને પૂર્ણપણે સાંકળી લેવાશે. શ્રમિકોને તેમના વિસ્તારમાં જ તબીબી સુવિધા મળે તે માટે હાલની 103 ESIC ડિસ્પેન્સરીઓની સંખ્યામાં મોટો વધારો કરાશે.
આ ઉપરાંત સાણંદ ખાતે 350 બેડની આધુનિક હોસ્પિટલ બનાવાશે. કલોલ, ગાંધીનગર અને હાલોલમાં નવી હોસ્પિટલોનું નિર્માણ કાર્ય ચાલુ છે. શ્રમિકોના બાળકોને તબીબી શિક્ષણ મળે તે માટે સુરતમાં નવી ESIC મેડિકલ કોલેજ સ્થાપવાનો નિર્ણય લેવાયો છે. મહેસાણા અને મોરબીમાં પણ નવી કોલેજો શરૂ કરવા માટે કેન્દ્ર સરકારને દરખાસ્ત મોકલાઈ છે.
તાજેતરના બે મહિનામાં 68 ખાનગી હોસ્પિટલોને ESIC સાથે જોડવામાં આવી છે. શ્રમિકો PMJAY યોજના હેઠળની હોસ્પિટલોમાં પણ નિઃશુલ્ક સારવાર મેળવી શકશે.
આ પગલાથી ગુજરાતના અસંગઠિત અને ઔદ્યોગિક ક્ષેત્રના લાખો શ્રમિકોને આર્થિક બોજ વિના ગુણવત્તાયુક્ત તબીબી સુરક્ષા મળશે. રાજ્યમાં આરોગ્ય માળખાના વિસ્તારથી શ્રમિક પરિવારોનું જીવનધોરણ સુધરશે અને ઔદ્યોગિક વિકાસને પણ ગતિ મળશે.