ગુજરાતમાં વીજળીના દરમાં વધારો થયો છે. સરકારી વીજ કંપનીઓએ ઈંધણ સરચાર્જ (FPPAS – ફ્યુઅલ પ્રાઇસ એન્ડ પાવર પર્ચેસ એડજસ્ટમેન્ટ સરચાર્જ)માં 3.99 ટકાનો વધારો કર્યો છે. તેની સીધી અસર ગ્રાહકોના વીજ બિલ પર યુનિટ દીઠ 30 થી 45 પૈસા સુધીની વધારાના રૂપમાં થશે.
આ વધારો રાજ્યભરના તમામ ઘર, ઓફિસ અને દુકાનોના વીજ ગ્રાહકોને લાગુ પડશે. નવા દરની અસર આગામી વીજ બિલમાં દેખાશે. તહેવારોના સમયે આ વધારો થતાં સામાન્ય પરિવારો અને નાના વેપારીઓના માસિક બજેટ પર દબાણ વધશે.
વીજ કંપનીઓ દ્વારા લેવાયેલા આ નિર્ણય પાછળ ઈંધણના ભાવ અને પાવર ખરીદીના ખર્ચમાં થયેલો વધારો કારણભૂત હોવાનું માનવામાં આવે છે. જોકે, સામાન્ય ગ્રાહકો માટે આ વધારો મોંઘવારી વચ્ચે વધુ એક બોજ સમાન છે.