દિવાળીના મીની વેકેશનમાં ગુજરાતના પ્રવાસન સ્થળોએ પ્રવાસીઓની ભારે ભીડ જોવા મળી છે. એકતાનગરમાં દોઢ લાખથી વધુ પ્રવાસીઓ ઉમટ્યા છે. ગીર સફારીની તમામ પરમિટ ફુલ થઈ ગઈ છે, જ્યારે દ્વારકાધીશના દર્શન માટે ભક્તોની ભીડ ઉમટી છે.
વડાપ્રધાન નરેન્દ્ર મોદી 13 અને 14 નવેમ્બરે ગુજરાતની મુલાકાતે આવશે. 13મીએ તેઓ ગાંધીનગરના લોકભવનમાં રાત્રિ રોકાણ કરશે અને 14મીએ અંબાજીમાં દર્શન કરી પૂજા-અર્ચના કરશે.
ભાજપ 2027ની ચૂંટણી પહેલાં 22 નવેમ્બરે રાજ્યની તમામ 182 બેઠકો પર એકસાથે સ્નેહમિલન યોજવાની તૈયારીમાં છે. ધારાસભ્યોને હાજર રહેવા સૂચના આપવામાં આવી છે, જ્યારે મુખ્યમંત્રી અને ઉપમુખ્યમંત્રી વર્ચ્યુઅલી સંબોધન કરશે.
સેન્ટ્રલ યુનિવર્સિટી ઓફ ગુજરાતમાં પ્રથમવાર મહિલા કુલપતિ તરીકે પ્રો. વિજિતા સિંહ અગ્રવાલે પદભાર સંભાળ્યો છે. તેમણે આધુનિક ટેક્નોલોજી, સંશોધન અને રોજગારલક્ષી શિક્ષણ પર ભાર મૂક્યો છે.
દિવાળી દરમિયાન 108 અને 112 પર ઈમરજન્સી કેસોમાં મોટો ઉછાળો નોંધાયો છે. 108 પર 5,934 કેસ નોંધાયા છે, જ્યારે આગના સૌથી વધુ 119 બનાવ સુરતમાં અને 67 અમદાવાદમાં નોંધાયા છે.
વડોદરાના આજવા રોડ પર ₹141 કરોડના ખર્ચે 300 બેડની અત્યાધુનિક SSG કાર્ડિયાક હોસ્પિટલ તૈયાર થઈ રહી છે. આ હોસ્પિટલમાં 125 ICU બેડ અને હાઈટેક મેડિકલ સુવિધાઓ ઉપલબ્ધ હશે. આ ગુજરાતની સૌથી મોટી કાર્ડિયોલોજી હોસ્પિટલ ગણાશે.
સુરતમાં પારસી વાડિયા પરિવાર 201 વર્ષથી ભગવાન સ્વામિનારાયણની પાઘડી અને શ્રીફળ સાચવે છે. સાત પેઢીથી જળવાતી આ ધરોહરના દર્શન દર વર્ષે માત્ર ભાઈબીજના દિવસે જ ભક્તો માટે ખુલ્લા મૂકવામાં આવે છે.
છોટા ઉદેપુરના પીપલેજ પાસે ઈકો કાર અને બાઈક વચ્ચે અકસ્માત સર્જાયો હતો. ટક્કર બાદ ઈકો કાર ઝાડ સાથે અથડાઈ પલટી ખાઈ હતી, જેમાં ત્રણના ઘટનાસ્થળે જ મોત નીપજ્યાં છે.
સુરતમાં 24 કલાકમાં બે હત્યાની ઘટનાઓ બની છે. ફટાકડા અને બાઇક કટની તકરારમાં સમાધાનના બહાને બોલાવી 28 વર્ષીય યુવકની છરીના ઘા ઝીંકી હત્યા કરાઈ છે, જ્યારે લસકાણામાં શ્રમિકની ગળું દબાવી હત્યા થઈ છે.
રાજુલા પાસે માંડળ ગામ નજીક ભૂંડ આડું ઉતરતાં બાઈકચાલક 36 વર્ષીય પ્રવીણ વાળા રોડ પર પટકાયા હતા. માથામાં ગંભીર ઈજા થતાં તેમનું ઘટનાસ્થળે જ મોત થયું હતું. અકસ્માત CCTVમાં કેદ થયો છે.