ગાંધીનગર: રાજ્યના કચ્છ, જામનગર અને દેવભૂમિ દ્વારકા જિલ્લામાં ઓછા વરસાદને કારણે ઊભી થયેલી પરિસ્થિતિ અંગે આજે મુખ્યમંત્રી ભૂપેન્દ્ર પટેલની અધ્યક્ષતામાં યોજાયેલી કેબિનેટ બેઠકમાં ઊંડી ચર્ચા કરવામાં આવી હતી.
બેઠકમાં ખાસ કરીને જામનગર અને દેવભૂમિ દ્વારકા જિલ્લામાં પીવાના પાણી અને પશુઓ માટે ઘાસચારાની ઉપલબ્ધતા અંગે સમીક્ષા કરવામાં આવી હતી. અહેવાલ મુજબ, મુખ્યમંત્રીએ તમામ જિલ્લા કલેક્ટરોને પૂરતો ઘાસચારો ઉપલબ્ધ રાખવા અને જરૂરિયાત મુજબ તેનો સ્ટોક જાળવવાની સૂચના આપી છે.
ઉપરાંત, બંને જિલ્લાઓમાં પાણી પુરવઠાની સ્થિતિ પર સતત નજર રાખવા અને નિયમિત સમીક્ષા કરવાનો આદેશ પણ આપવામાં આવ્યો છે. ઓછા વરસાદની આ સ્થિતિમાં લોકો અને પશુપાલકોને કોઈ મુશ્કેલી ન પડે તે માટે તંત્રને જરૂરી પગલાં લેવાની સૂચના આપવામાં આવી છે.