નાણા મંત્રાલયના સૂત્રો અનુસાર, જીએસટી કાઉન્સિલ હવે વર્ષમાં માત્ર એક જ વાર ટેક્સ દરમાં ફેરફારના પ્રસ્તાવ પર વિચારણા કરશે. આ ફેરફારો દર વર્ષે 1 એપ્રિલથી લાગુ થશે, એટલે કે નાણાકીય વર્ષની શરૂઆતથી. કેન્દ્રીય નાણા મંત્રી નિર્મલા સીતારમનની અધ્યક્ષતાવાળી અને રાજ્યોના નાણા મંત્રીઓની જીએસટી કાઉન્સિલે ગયા વર્ષે સપ્ટેમ્બરમાં કર, દરો અને સ્લેબને તર્કસંગત બનાવવાનો નિર્ણય કર્યો હતો.
ચાર સ્લેબવાળી જીએસટી (5, 12, 18 અને 28 ટકા) વ્યવસ્થાને બદલીને 5 અને 18 ટકાની બે-દર વાળી વ્યવસ્થા લાગુ કરવામાં આવી હતી.
નાણા મંત્રાલયના સૂત્રોએ જણાવ્યું કે, 8 ઑક્ટોબરે યોજાનારી 57મી જીએસટી પરિષદની બેઠકના એજન્ડામાં કર દરોમાં ફેરફાર સામેલ નથી. આગામી બેઠકમાં દરોને તર્કસંગત બનાવવા અને અસ્પષ્ટતા દૂર કરવા સાથે જોડાયેલા સીમિત મુદ્દાઓ પર વિચારણા થશે. અન્ય પ્રસ્તાવો હેઠળ કાઉન્સિલ એ મંજૂર કરી શકે છે કે, ઈ-કોમર્સ પ્લેટફોર્મ દ્વારા કરવામાં આવતી સપ્લાય પર ઇનપુટ ટેક્સ ક્રેડિટ વિના 5 ટકાનો જીએસટી દર લાગુ થશે.
સૂત્રોએ જણાવ્યું કે, મોટાભાગના વેપારીઓ માટે કોઈ એક છૂટછાટ કરતાં વધુ મહત્ત્વપૂર્ણ નિશ્ચિતતા છે. સ્થિર કર દર વ્યવસ્થાથી કોન્ટ્રાક્ટના સમગ્ર સમયગાળા માટે કિંમત નક્કી કરવામાં અને મૂડી ખર્ચ (કેપિટલ એક્સપેન્ડિચર)નું આયોજન કરવામાં મદદ મળે છે.
ગયા વર્ષે પુનર્ગઠિત કરાયેલું જીએસટી માળખું લગભગ એક વર્ષથી લાગુ છે, અને તેનાથી ગ્રાહકો, ઉદ્યોગો, ટેક્સ મહેસૂલ તથા અર્થતંત્રને ફાયદો થયો છે. ગયા વર્ષે જીએસટી દરોને તર્કસંગત બનાવવાથી વપરાશને પ્રોત્સાહન મળ્યું છે, અને જીએસટી મહેસૂલમાં પણ વધારો થયો છે. આ વર્ષે જૂનથી માસિક જીએસટી આવકમાં બે આંકડામાં વૃદ્ધિ નોંધાઈ છે.