બોલિવૂડ અભિનેતા ગોવિંદાની પત્ની સુનીતા આહુજા અને તેમની કથિત ગર્લફ્રેન્ડ કોમલ રાની સ્વર્ણકાર વચ્ચેનો વિવાદ વધુ ઘેરો બની રહ્યો છે. કોમલે સુનીતા પર પોતાના જ પતિને મારવાનો પ્રયાસ કરવાનો ગંભીર આરોપ લગાવ્યો છે. હવે ગોવિંદાની ભાણેજ અને અભિનેત્રી કશ્મીરા શાહ મામી સુનીતાના સમર્થનમાં ઉતરી આવી છે.
કશ્મીરાએ ઇન્સ્ટાગ્રામ પર પોસ્ટ કરીને કોમલ રાની પર નિશાન સાધ્યું છે. તેમણે લખ્યું, 'પોતાની 30 વર્ષની કારકિર્દી અને 50 ફિલ્મોના અનુભવમાં મેં ક્યારેય એવું જોયું નથી કે કોઈ કૉ-સ્ટારને મારા અંગત જીવન અથવા લાગણીઓની જાણકારી હોય. મેં માત્ર મારા પતિ કૃષ્ણા સાથે જ મારી અંગત વાતો શેર કરી છે.'
તેમણે પ્રશ્ન ઉઠાવ્યો કે, કામ કરવાની જગ્યાએ આવો કોઈ સંબંધ તેમણે ક્યારેય જોયો નથી, જેમાં કોઈ કૉ-સ્ટારને આટલી અંગત વાતોની જાણકારી હોય.
કોમલના આરોપોનો જવાબ આપતાં કશ્મીરાએ લખ્યું, 'પોતાના પરિવારની સંભાળ રાખતી મહિલાઓને ઘણીવાર ઘમંડી, પ્રભુત્વ જમાવનારી અથવા સ્વાર્થી કહી દેવામાં આવે છે. પરંતુ આ પહેલીવાર છે જ્યારે કોઈને 'હત્યારી' કહેવામાં આવી રહી છે.' તેમણે ઉમેર્યું, 'જો પોતાના લોકોની સુરક્ષા કરનારી માતા, પત્ની કે બહેનને હત્યારી કહેવામાં આવે, તો મને તેના પર ગર્વ છે. હું હંમેશા તમારી સાથે ઊભી રહીશ.'
ઉલ્લેખનીય છે કે, સુનીતા આહુજાએ તાજેતરમાં કોલકાતાના દક્ષિણેશ્વર કાલી મંદિરમાં પૂજા-અર્ચના કર્યા બાદ કહ્યું હતું કે, 'હું આજે દક્ષિણેશ્વર કાલી માતા રાણીનાં દર્શન કરવા આવી છું. તમે બધા જાણો છો કે મહાકાલી રાક્ષસોનો નાશ કરે છે. મારા જીવનમાં પણ કેટલાક રાક્ષસો છે, માતાને કહેવા આવી છું કે તેમનો પણ નાશ કરે.'
આના જવાબમાં કોમલ રાનીએ તેના સત્તાવાર સોશિયલ મીડિયા એકાઉન્ટ પરથી લખ્યું, 'જે સ્ત્રી વર્ષોથી પોતાના જ પતિને જાનથી મારી નાખવાનો પ્રયાસ કરી રહી હોય, એવી સ્ત્રીનો શ્રાપ કોઈને લાગતો નથી. જે ઘર પહેલાથી જ ભાંગેલું હોય, તેને કોઈ તોડી શકતું નથી. આપણા દેશના લોકો એટલા મૂર્ખ નથી કે કોઈ તેમને કહે કે 'કાગડો તારો કાન લઈ ગયો' અને તે કાગડા પાછળ દોડવા લાગે. મને નથી સમજાતું કે કોઈ સ્ત્રીને કેવા પ્રકારનું દર્દ છે, જ્યાં તે તેને સાજા કરવાનો પ્રયાસ કરવાને બદલે, તેને જાહેરમાં પ્રદર્શિત કરવાનો આનંદ માણતી હોય એવું લાગે છે.'
કોમલે વધુમાં કહ્યું, 'શું આવી સ્ત્રીઓ માનસિક રીતે અસ્વસ્થ હોય છે, અથવા તે પોતાની હોશિયારીમાં જ ખૂબ ચતુર હોય છે અને પૂરી રીતે જાણતી હોય છે કે જે તે બંધ દરવાજા પાછળ ન કરી શકી, તે તે જાહેર થઈને લોકોની સહાનુભૂતિ મેળવીને પ્રાપ્ત કરી શકે છે? તમારા એજન્ડા પૂરા કરવા માટે મારા નામનો ઉપયોગ કરવાનું બંધ કરો. ભગવાન દરેક ભલા પુરુષને આવી ચાલાક સ્ત્રીઓથી બચાવે.'