ભારત અને અમેરિકામાં વધતી મોંઘવારી અને વ્યાજદર વધવાની શક્યતાને કારણે સોના-ચાંદીના ભાવમાં મોટો ઘટાડો જોવા મળ્યો છે. સ્થાનિક વાયદા બજારમાં સોનું 2,300 રૂપિયા તૂટીને 1,34,385 રૂપિયા પ્રતિ 10 ગ્રામ થયું છે, જ્યારે ચાંદીમાં 7,100 રૂપિયાથી વધુનો કડાકો બોલીને 1,69,194 રૂપિયા પ્રતિ કિલોગ્રામ નોંધાઈ છે. આંતરરાષ્ટ્રીય બજારોમાં પણ કિંમતી ધાતુઓના ભાવ ઘટ્યા છે.
દેશના વાયદા બજાર એટલે કે મલ્ટી કોમોડિટી એક્સચેન્જ (MCX) પર સોનાના ભાવમાં મોટો ઘટાડો જોવા મળ્યો છે. શુક્રવારે 1,36,705 રૂપિયા પ્રતિ 10 ગ્રામના સ્તરે બંધ થયેલું સોનું આજે સવારે ઘટાડા સાથે 1,35,853 રૂપિયા પર ખૂલ્યું હતું. કારોબારી સત્ર દરમિયાન ભાવમાં 2,320 રૂપિયા પ્રતિ 10 ગ્રામનો કડાકો બોલતા તે 1,34,385 રૂપિયાની નીચી સપાટીએ પહોંચી ગયું હતું. બપોરે 3:30 વાગ્યાના આંકડા મુજબ, સોનું 2,055 રૂપિયાના ઘટાડા સાથે 1,34,650 રૂપિયા પ્રતિ 10 ગ્રામ પર કારોબાર કરી રહ્યું હતું.
સોનાની સાથે-સાથે સ્થાનિક વાયદા બજારમાં ચાંદીના ભાવ પણ ધરાશાયી થયા છે. ગત સપ્તાહના અંતિમ કારોબારી દિવસે 1,76,309 રૂપિયા પ્રતિ કિલોગ્રામ પર બંધ થયેલી ચાંદી આજે સવારે ઘટીને 1,72,400 રૂપિયા પર ખૂલી હતી. દિવસ દરમિયાન ચાંદીમાં 7,115 રૂપિયા પ્રતિ કિલોગ્રામનો જંગી ઘટાડો નોંધાતા ભાવ 1,69,194 રૂપિયાના સ્તરે સરકી ગયો હતો. બપોરે 3:30 વાગ્યે ચાંદી 6,925 રૂપિયાના ઘટાડા સાથે 1,69,384 રૂપિયા પ્રતિ કિલોગ્રામ પર ટ્રેડ થઈ રહી હતી.
વિદેશી બજારોમાં પણ સોના અને ચાંદીના ભાવ પર દબાણ જોવા મળી રહ્યું છે. ન્યૂયોર્કના કોમેક્સ માર્કેટમાં ગોલ્ડ ફ્યુચર અંદાજે 28 ડોલર પ્રતિ ઔંસના ઘટાડા સાથે 3,858.40 ડોલર પ્રતિ ઔંસ પર કારોબાર કરી રહ્યું છે, જ્યારે ગોલ્ડ સ્પોટના ભાવ 32 ડોલર તૂટીને 3,852.0300 ડોલર પ્રતિ ઔંસ પર ટ્રેડ થઈ રહ્યા હતા. બીજી તરફ, સિલ્વર ફ્યુચરની કિંમતો અંદાજે 4 ટકાના ઘટાડા સાથે 47.29 ડોલર પ્રતિ ઔંસ અને સિલ્વર સ્પોટ અંદાજે 3 ટકા ઘટીને 47.3400 ડોલર પ્રતિ ઔંસ પર કારોબાર કરી રહી છે.
બજારના જાણકારોના મતે, ભારત અને અમેરિકા બંને દેશોમાં વધેલા મોંઘવારીના આંકડાઓને કારણે ડિસેમ્બર મહિનામાં વ્યાજ દરોમાં 75 બેસિસ પોઈન્ટ્સ સુધીનો વધારો થઈ શકે છે. ભારતીય રિઝર્વ બેંકની મોનેટરી પોલિસી કમિટી (RBI MPC) 4 ડિસેમ્બરે પોતાની નીતિ જાહેર કરશે, જેમાં વ્યાજ દરો વધારીને 6.25 ટકા સુધી લઈ જવામાં આવે તેવી શક્યતા છે. આ ઉપરાંત, અમેરિકન ફેડરલ રિઝર્વની બેઠક પણ ડિસેમ્બરમાં યોજાવાની છે અને 9 ડિસેમ્બરે વ્યાજ દરો અંગે જાહેરાત થશે. ફેડ રિઝર્વ દ્વારા વ્યાજ દરો વધારવાની 90 ટકા સુધીની સંભાવના વ્યક્ત કરવામાં આવી રહી છે, જેના ડરથી રોકાણકારો વેચવાલી તરફ વળતા સોના-ચાંદીમાં આ મોટો કડાકો જોવા મળ્યો છે.