મલ્ટી કમોડિટી એક્સચેન્જ (MCX) પર મંગળવારે સોના-ચાંદીના ભાવમાં નોંધપાત્ર ઘટાડો જોવા મળ્યો છે. ચાંદી પ્રતિ કિલો 8,000 રૂપિયા સસ્તી થઈ છે, જ્યારે સોનું પ્રતિ 10 ગ્રામ 1,300 રૂપિયા ઘટ્યું છે. આ ઘટાડા સાથે ચાંદી 1.80 લાખ રૂપિયાની નીચે આવી ગઈ છે અને સોનું 1,38,800 રૂપિયા પ્રતિ 10 ગ્રામ પર બંધ થયું છે.
અગાઉના સત્રમાં ચાંદીનો ભાવ 1.83 લાખ રૂપિયાને પાર પહોંચ્યો હતો, પરંતુ મંગળવારે બજાર ખુલતાં જ તેમાં મોટો ઘટાડો થયો હતો. એક જ ઝાટકે ચાંદી પ્રતિ કિલો 4,429 રૂપિયા સસ્તી થઈ ગઈ હતી અને બપોર સુધીમાં ઘટાડો વધીને 8,000 રૂપિયા થઈ ગયો હતો. ચાંદીમાં આશરે 5 ટકા અને સોનામાં 2 ટકાનો ઘટાડો નોંધાયો છે.
નોંધનીય છે કે ચાંદીનો ભાવ 29 જાન્યુઆરી 2026ના રોજ પ્રતિ કિલો 4,20,048 રૂપિયાના સર્વકાલીન ઊંચા સ્તરે પહોંચ્યો હતો, જે હવે ઘટીને 1.80 લાખ રૂપિયાની આસપાસ છે. એટલે કે તે સર્વકાલીન ઊંચા સ્તરથી 2.40 લાખ રૂપિયા સસ્તી થઈ ગઈ છે.
સોનાની વાત કરીએ તો, 4 ડિસેમ્બરની એક્સપાયરીવાળું 24 કેરેટ સોનું પ્રતિ 10 ગ્રામ 1,38,800 રૂપિયા પર આવી ગયું છે, જ્યારે અગાઉના સત્રમાં તે 1,40,186 રૂપિયા પ્રતિ 10 ગ્રામ પર બંધ થયું હતું. આમ, એક જ ઝાટકે સોનું પ્રતિ 10 ગ્રામ 1,386 રૂપિયા સસ્તું થયું છે.
આ ઘટાડો આંતરરાષ્ટ્રીય બજારમાં આવેલી મંદીને કારણે થયો છે. સ્થાનિક અને વાયદા બજારમાં આવી ઉથલપાથલની સીધી અસર ગ્રાહકોની ખરીદી પર પડી રહી છે. ધનતેરસ જેવા તહેવાર પહેલાં ભાવમાં આવેલો આ ઘટાડો ગ્રાહકો માટે રાહતરૂપ ગણાય છે.