મહારાષ્ટ્રના કોલ્હાપુરમાં 'ગોકુલ' દૂધ સહકારી સંઘ પર નિયંત્રણ મેળવવાના મામલે રાજકીય વિવાદ ઊભો થયો છે. ભાજપના નેતૃત્વવાળી મહાયુતિ સરકારે સહકારી સંસ્થાઓના નિયમોમાં ફેરફાર કરીને એક વટહુકમ બહાર પાડ્યો છે. આ વટહુકમ હેઠળ 500 કરોડ રૂપિયાથી વધુ ટર્નઓવર ધરાવતી સહકારી સંસ્થાઓની મેનેજિંગ કમિટીમાં સરકાર પાંચ સભ્યોની નિમણૂક કરશે, જેમાંથી ચાર સભ્યોને બોર્ડ ઓફ ડિરેક્ટર્સમાં મતદાનનો અધિકાર મળશે.
આ નિર્ણયનો વિરોધ કરતાં કોંગ્રેસ, વિપક્ષી મહાવિકાસ અઘાડી (MVA) અને દૂધ ઉત્પાદક ખેડૂતોએ કોલ્હાપુરમાં પશુઓ સાથે વિશાળ મોરચો કાઢ્યો હતો. કોંગ્રેસના વરિષ્ઠ નેતા અને MLC સતેજ (બંટી) પાટિલની આગેવાની હેઠળ 'રાજર્ષિ શાહૂ શેતકરી સમવિચારી અઘાડી' દ્વારા દશેરા ચોકથી જિલ્લા કલેક્ટર કચેરી સુધી મહામોરચો કાઢવામાં આવ્યો. આ મોરચામાં જિલ્લાભરમાંથી મોટી સંખ્યામાં દૂધ ઉત્પાદક ખેડૂતો પોતાના પશુઓ સાથે જોડાયા હતા. પ્રદર્શનકારીઓએ કાળા વાવટા અને સરકાર વિરોધી બેનરો સાથે સૂત્રોચ્ચાર કર્યા હતા. આ મોરચામાં સાંસદ વિશાલ પાટિલ, ધૈર્યશીલ મોહિતે-પાટિલ, સ્વાભિમાની શેતકરી સંગઠનના પ્રમુખ રાજૂ શેટ્ટી અને સ્થાનિક વકીલો પણ જોડાયા હતા. વકીલોએ સહકારી સંસ્થાઓમાં લોકતાંત્રિક મૂલ્યોના રક્ષણ માટે આંદોલનને સમર્થન આપવાની જાહેરાત કરી હતી.
કોંગ્રેસે ભાજપ સરકાર પર ચૂંટણીમાં મળેલા જનાદેશની અવગણના કરવાનો આરોપ લગાવ્યો છે. ગોકુલ દૂધ સંઘની 25 બેઠકોની ચૂંટણીમાં કોંગ્રેસ પ્રેરિત પેનલે 13 બેઠકો જીતીને બહુમતી મેળવી હતી, જ્યારે ભાજપ-મહાયુતિ ગઠબંધનને 12 બેઠકો મળી હતી. કોંગ્રેસનો આક્ષેપ છે કે ચૂંટણીમાં પરાજય પછી ભાજપ સરકારે નિયમો બદલીને ચાર નોમિનેટેડ ડિરેક્ટરોને મતદાનનો અધિકાર આપીને પોતાની બેઠકો 12થી વધારીને 16 કરી બહુમતી ઉલટાવવાનો પ્રયાસ કર્યો છે. કોંગ્રેસે જણાવ્યું કે મહારાષ્ટ્રના ખેડૂતો આ જનાદેશની અવગણના ક્યારેય માફ નહીં કરે.
મહારાષ્ટ્ર કેબિનેટે મહારાષ્ટ્ર કો-ઓપરેટિવ સોસાયટીઝ એક્ટ, 1960માં સુધારો કરીને આ નિર્ણય લીધો છે. જે અંતર્ગત ડિસ્ટ્રિક્ટ સેન્ટ્રલ કો-ઓપરેટિવ બેંકો સિવાય 500 કરોડ રૂપિયાથી વધુનું વાર્ષિક ટર્નઓવર ધરાવતી સહકારી સંસ્થાઓની મેનેજિંગ કમિટીમાં સરકાર પાંચ સભ્યોની નિમણૂક કરશે, જેમાંથી ચારને બોર્ડ ઓફ ડિરેક્ટર્સમાં મતદાનનો અધિકાર હશે. 4,000 કરોડ રૂપિયાથી વધુનું ટર્નઓવર ધરાવતી ગોકુલ ડેરીમાં આ વટહુકમ લાગુ થવાથી શાસક પક્ષ મહાયુતિનું સંખ્યાબળ 12થી વધીને 16 થઈ જાય છે, જેનાથી ચૂંટાયેલા બોર્ડનું સમીકરણ બદલાઈ જાય છે.
આ વિવાદ બોમ્બે હાઈકોર્ટમાં પહોંચ્યો છે. સમવિચારી અઘાડીએ સરકારના આ વટહુકમને રદ કરવાની માંગ સાથે હાઈકોર્ટમાં અરજી દાખલ કરી છે. કોલ્હાપુર બેંચમાં રજા હોવાથી આ કેસની સુનાવણી સોમવારે છત્રપતિ સંભાજીનગર બેંચ સમક્ષ થશે. આ પહેલાં સતેજ પાટિલ, સાંસદો અને ખેડૂત નેતાઓએ પાટિલની અજિંક્યતારા ઓફિસ ખાતે સંકલન બેઠક યોજીને આગળની રણનીતિ નક્કી કરી હતી. કાયદો અને વ્યવસ્થા જળવાઈ રહે તે માટે પ્રદર્શનના સમગ્ર રૂટ પર અને કલેક્ટર કચેરીની આસપાસ ચુસ્ત પોલીસ બંદોબસ્ત તૈનાત કરવામાં આવ્યો હતો.