ગોવામાં ચૂંટણી પંચની 'સ્પેશિયલ ઇન્ટેન્સિવ રિવિઝન' (SIR) પ્રક્રિયા દરમિયાન અંતિમ મતદાર યાદીમાંથી 97 લાયક મતદારોના નામ ગાયબ થયા છે. આ મતદારોને સ્થાનિક ઇલેક્ટોરલ રજિસ્ટ્રેશન ઓફિસર્સ (EROs) દ્વારા ચકાસણી બાદ યોગ્ય ઠેરવવામાં આવ્યા હતા, છતાં અંતિમ યાદીમાં તેમનો સમાવેશ થયો નથી.
મળતી માહિતી મુજબ, આ ભૂલ પાછળ ECINet સિસ્ટમનું કેન્દ્રીકરણ જવાબદાર છે. ગોવાના મુખ્ય ચૂંટણી અધિકારી (CEO) સંજય ગોયલે 17 ફેબ્રુઆરી 2026ના રોજ અંતિમ યાદી પ્રકાશિત થવાના ચાર દિવસ પહેલાં દિલ્હી સ્થિત ચૂંટણી પંચને ઈમેલ મોકલીને આ 97 મતદારોના નામ રદ કરવાનો નિર્ણય બદલવા વિનંતી કરી હતી. તેમણે અગાઉ પણ સાત ઈમેલ મોકલ્યા હતા, પરંતુ કોઈ પ્રતિક્રિયા મળી નહોતી. બીજા દિવસે ડેપ્યુટી ઇલેક્શન કમિશનરે આઈટી વિભાગના ડિરેક્ટર જનરલ સીમા ખન્નાને ઈમેલ લખીને જરૂરી કાર્યવાહી કરવા નિર્દેશ પણ આપ્યો હતો. છતાં 20 સપ્ટેમ્બર 2026ના રોજ અંતિમ યાદીમાં આ મતદારોના નામ નહોતા.
CEO સંજય ગોયલે જણાવ્યું કે નામ હટાવવાનો નિર્ણય પાછળથી બદલવામાં આવ્યો હોવા છતાં, ECINet સિસ્ટમમાં તેને પલટવાની (રોલબેક) કોઈ સુવિધા ન હોવાથી આ સમસ્યા સર્જાઈ. આ અગાઉ ચૂંટણી કમિશનર સુખબીર સિંહ સંધુ અને વિવેક જોષીએ પણ ECINet સિસ્ટમની કેન્દ્રીકૃત કાર્યપ્રણાલી સામે વાંધો ઉઠાવ્યો હતો.
આ મામલે કોંગ્રેસે ચૂંટણી પંચ પર આક્રમક આક્ષેપો કર્યા છે. પાર્ટી નેતા જયરામ રમેશે દાવો કર્યો છે કે ચૂંટણી પ્રક્રિયા સાથે ગંભીર છેડછાડ થઈ છે અને પક્ષે મુખ્ય ચૂંટણી કમિશનર જ્ઞાનેશ કુમારના રાજીનામાની માંગ ફરી કરી છે. સોશિયલ મીડિયા પર કોંગ્રેસે આરોપ લગાવ્યો છે કે વડાપ્રધાનના ઇશારે આખી સિસ્ટમ પર કાબૂ મેળવીને 'વોટ ચોરી' જેવા કૃત્યો થઈ રહ્યા છે. વરિષ્ઠ નેતા શશિ થરૂરે પણ આ ઘટનાને ગંભીર ગણાવીને કહ્યું કે આ નાગરિકોના બંધારણીય અધિકારો છીનવી લેવા સમાન છે અને ચૂંટણી પંચે દેશની માફી માંગવી જોઈએ.
ઉલ્લેખનીય છે કે 22 જાન્યુઆરીથી જ ફિલ્ડ સ્તરેથી વિનંતીઓ મોકલવામાં આવી રહી હતી. 13 ફેબ્રુઆરીથી 18 ફેબ્રુઆરી સુધી સતત 8 ઈમેલ મોકલીને ડેટા ફરીથી અપલોડ કરવાની અથવા રોલબેકની સુવિધા માંગવામાં આવી હતી, પરંતુ કોઈ જવાબ મળ્યો નહોતો. અંતે, અસરગ્રસ્ત મતદારોને નવા મતદારો માટેના 'ફોર્મ 6' પર ફરીથી અરજી કરવા જણાવવામાં આવ્યું છે.
આ સમગ્ર ઘટનાક્રમે ચૂંટણી પંચની ટેકનિકલ વ્યવસ્થા અને કેન્દ્રીકૃત કાર્યપ્રણાલી સામે ગંભીર સવાલો ઊભા કર્યા છે. આ વિવાદ એવા સમયે સામે આવ્યો છે જ્યારે અગાઉ એવા અહેવાલો આવ્યા હતા કે ચૂંટણી કમિશનર સંધુ અને જોષીએ મુખ્ય ચૂંટણી કમિશનર જ્ઞાનેશ કુમારના નેતૃત્વમાં લેવાયેલા નિર્ણયો સામે ઓછામાં ઓછા 14 વખત વાંધો ઉઠાવ્યો હતો.