ગોવા સરકારે રાજ્યના મૂળ નિવાસીઓ માટે મોટી જાહેરાત કરી છે. મુખ્યમંત્રી પ્રમોદ સાવંતે જણાવ્યું છે કે દર વર્ષે ત્રણ LPG ગેસ સિલિન્ડર મફત આપવામાં આવશે. આ યોજના હેઠળ વાર્ષિક ₹3,000ની રકમ સીધી લાભાર્થીઓના બેન્ક ખાતામાં જમા થશે. અરજી ફોર્મ 5 સપ્ટેમ્બરથી ઉપલબ્ધ થશે, જ્યારે 9 સપ્ટેમ્બરથી રકમ ટ્રાન્સફર શરૂ થશે.
આ યોજના 2022ની વિધાનસભા ચૂંટણી દરમિયાન ભાજપે કરેલા વચનનો ભાગ છે. મુખ્યમંત્રીએ પણાજીમાં એક કાર્યક્રમમાં જણાવ્યું કે આ નિર્ણયથી મોંઘવારીના સમયમાં લોકોને આર્થિક રાહત મળશે.
યોજનાનો લાભ ફક્ત ગોવાના મૂળ નિવાસીઓને જ મળશે. અરજી માટે બેન્ક પાસબુક, આધાર કાર્ડ અને વોટર આઈડી કાર્ડની કોપી જરૂરી છે. દસ્તાવેજોની ચકાસણી બાદ રકમ સીધી બેન્ક ખાતામાં જમા થશે.
આ જાહેરાત એવા સમયે આવી છે જ્યારે વૈશ્વિક તણાવ અને ઊર્જા પુરવઠાની સમસ્યાને કારણે LPG ભાવમાં વધારો થયો છે. સરકારનું કહેવું છે કે આ પગલાથી ગૃહિણીઓ અને ગરીબ પરિવારોને આર્થિક આશરો મળશે.