ગીર સોમનાથ જિલ્લાના ગીરગઢડા તાલુકાના પાંખકાણ ગામમાં સોમવારે સિંહણ અને તેના બાળસિંહ રસ્તો ક્રોસ કરતાં જોવા મળ્યાં હતાં. રહેણાંક વિસ્તાર નજીકના આ રસ્તા પરથી પસાર થતા વાહનચાલકોએ ગાડીઓ થોભાવીને તેમને રસ્તો છોડી દેવા દીધો હતો.
ઘટનાનો વીડિયો એક રાહદારીએ મોબાઇલમાં કેદ કર્યો છે. વીડિયોમાં સિંહણ પોતાના બાળસિંહ સાથે શાંતિથી રસ્તો ક્રોસ કરતી જોઈ શકાય છે. આ દરમિયાન કોઈ અનિચ્છનીય બનાવ બન્યો નથી.
ગીરગઢડા પંથકમાં વસાહતો નજીક સિંહોની અવરજવર સામાન્ય છે. વન વિભાગના જણાવ્યા અનુસાર, સિંહો રાત્રિના સમયે શિકાર અને ભ્રમણ માટે રહેણાંક વિસ્તારો તરફ આવે છે. આવા સમયે લોકોએ સાવચેતી રાખવી જરૂરી છે.
વન વિભાગે લોકોને અપીલ કરી છે કે જંગલી પ્રાણી દેખાય તો તેની નજીક ન જવું, તેને હેરાન ન કરવું અને સુરક્ષિત અંતર જાળવવું. કોઈ સમસ્યા ઊભી થાય તો તાત્કાલિક વન વિભાગની હેલ્પલાઇન 1926 પર સંપર્ક કરવો.