સત્ય. સાહસ. સંકલ્પ.

ગિલે ન્યૂઝીલેન્ડ પ્રવાસ પહેલાં કેન વિલિયમસન પાસેથી બેટિંગની ટિપ્સ લીધી, કિવી દિગ્ગજે શીખવાની ભૂખની પ્રશંસા કરી

ગિલે ન્યૂઝીલેન્ડ પ્રવાસ પહેલાં કેન વિલિયમસન પાસેથી બેટિંગની ટિપ્સ લીધી, કિવી દિગ્ગજે શીખવાની ભૂખની પ્રશંસા કરી

ભારતીય ક્રિકેટ ટીમના કેપ્ટન શુભમન ગિલે ન્યૂઝીલેન્ડ પ્રવાસની તૈયારી માટે ન્યૂઝીલેન્ડના ભૂતપૂર્વ કેપ્ટન કેન વિલિયમસનની મદદ લીધી છે. ગિલે ગયા મહિને ઑકલેન્ડ પહોંચીને પ્રેક્ટિસ કરી હતી, જ્યાં વિલિયમસને તેમની અને ગુરનૂર બરારની પ્રેક્ટિસની વ્યવસ્થા કરી હતી. આ વાત વિલિયમસને તેમની આત્મકથા 'બેર માર્જિન્સ'ના લોન્ચિંગ પ્રસંગે 'ટાઈમ્સ ઓફ ઈન્ડિયા'ને આપેલા ઇન્ટરવ્યૂમાં જણાવી હતી.

વિલિયમસને કહ્યું કે ગિલે ઇંગ્લેન્ડ પ્રવાસ પહેલાં પણ તેમની સાથે બેટિંગ ટેક્નિક્સ અંગે ચર્ચા કરી હતી. તેમણે ગિલની શીખવાની ઉત્સુકતાની પ્રશંસા કરી હતી. વિલિયમસને જણાવ્યું, 'શુભમન શ્રેષ્ઠ વ્યક્તિ હોવા ઉપરાંત રમતનો સાચો વિદ્યાર્થી છે. અમારો સંબંધ ઘણો જૂનો છે. અમે ગુજરાત ટાઇટન્સમાં સાથે રમ્યા છીએ. તે સમયાંતરે બેટિંગની ઝીણવટભરી બાબતો અંગે ચર્ચા કરવા માટે મારી સાથે વાત કરતો રહે છે. એક બેટર તરીકે પોતાને વધુ સારો બનાવવાની તેની ભૂખ પ્રશંસનીય છે.'

વિલિયમસને ઉમેર્યું, 'તે સતત પોતાને વધુ સારો બનાવવા માગે છે. આ જ કારણ છે કે તેની કારકિર્દી સતત આગળ વધી રહી છે. શીખવાની તેની ઉત્સુકતા તેને બાકીના ખેલાડીઓથી અલગ બનાવે છે.'

ગયા વર્ષે ઇંગ્લેન્ડ પ્રવાસ પર શુભમન ગિલ અને ભારતીય ટીમનું પ્રદર્શન સારું રહ્યું હતું. વિલિયમસને કહ્યું, 'ઇંગ્લેન્ડમાં તેમણે અને સમગ્ર ટીમે ખૂબ સારું પ્રદર્શન કર્યું હતું. હું તેમને ન્યૂઝીલેન્ડની પરિસ્થિતિઓમાં બેટિંગ કરતા જોવા માટે ઉત્સાહિત છું.' તેમણે કહ્યું કે ગિલ વર્લ્ડ ક્લાસ બેટર છે અને તેમને ખાતરી છે કે અહીં ગિલ બેટિંગનો ભરપૂર આનંદ માણશે.

ન્યૂઝીલેન્ડની પરિસ્થિતિઓ કોઈપણ મહેમાન ટીમ માટે પડકારજનક હોય છે, પરંતુ ટેસ્ટ સિરીઝ શરૂ થશે ત્યારે ગિલ આ પડકાર માટે તૈયાર હશે.

વેલિંગ્ટનના મેદાન પર ફૂંકાતા તેજ પવનો (ક્રોસવિન્ડ્સ) બેટ્સમેનો માટે પડકારરૂપ બને છે. વિલિયમસને કહ્યું, 'તેજ ક્રોસવિન્ડ્સ ક્યારેક બેટરનું સ્ટાન્સ પણ બગાડી શકે છે. તેથી તેના માટે તૈયાર રહેવું જરૂરી છે. બેટરે એ પણ સમજવું પડે કે પવન કઈ દિશામાં ફૂંકાઈ રહ્યો છે. જો પવન બોલરની વિપરીત દિશામાં હોય, તો એક છેડેથી બોલ બીજા છેડાની તુલનામાં ધીમો આવી શકે છે.'

બંને ટીમના બેટર્સને સલાહ આપતાં વિલિયમસને કહ્યું કે આ માટે ટેકનિકમાં મોટા ફેરફાર કરવાની જરૂર નથી. બેટિંગમાં સંતુલન સૌથી મહત્વપૂર્ણ છે. ક્રિઝ પર પોતાને શાંત અને સંતુલિત રાખીને જ તેજ પવનનો સામનો કરી શકાય છે.

વિલિયમસન માને છે કે ન્યૂઝીલેન્ડના તેજ પવનોમાં બોલિંગ કરવી બેટિંગ કરતાં વધુ પડકારજનક હશે. તેમણે ભારતીય ઝડપી બોલર મોહમ્મદ સિરાજની પ્રશંસા કરતાં કહ્યું, 'બોલરો માટે અહીં પડકાર વધુ મોટો હશે. મને આશા છે કે ભારત તરફથી મોહમ્મદ સિરાજ સૌથી વધુ જવાબદારી સંભાળશે, કારણ કે તેઓ મોટા દિલવાળા બોલર છે અને લાંબા સ્પેલ નાખી શકે છે.'