રાજકોટ સહિત સમગ્ર સૌરાષ્ટ્રમાં દિવાળી નજીક આવતાં શુદ્ધ ઘીની અછત ઊભી થઈ છે. મીઠાઈ અને પકવાન માટે ઘીની માંગ વધતાં છેલ્લા કેટલાક દિવસમાં ઓરિજિનલ ઘીના ભાવમાં કિલોદીઠ 40 થી 50 રૂપિયાનો વધારો થયો છે. જેના કારણે સામાન્ય ગ્રાહકનું બજેટ ખોરવાયું છે.
બજારમાં અચાનક ઘીની અછત ઊભી થવા પાછળનું એક મુખ્ય કારણ આરોગ્ય વિભાગની કાર્યવાહી છે. છેલ્લા ત્રણથી ચાર મહિનાથી રાજ્યના આરોગ્ય વિભાગ દ્વારા ઘીના વેપારીઓ અને ડેરીઓ પર સતત દરોડા પાડવામાં આવી રહ્યા છે. આ ચેકિંગને કારણે બજારમાં છડેચોક વેચાતા નકલી ઘીનું વેચાણ નોંધપાત્ર રીતે ઘટ્યું છે. નકલી ઘી બજારમાંથી ગાયબ થતાં ગ્રાહકોનો ધસારો અસલી ઘી તરફ વધ્યો છે.
એક તરફ નકલી ઘીનું વેચાણ બંધ થયું છે, તો બીજી તરફ દિવાળીના તહેવારને કારણે માંગમાં મોટો ઉછાળો આવ્યો છે. માંગ સામે શુદ્ધ ઘીનો પૂરવઠો ઓછો હોવાથી ભાવમાં સીધો વધારો થયો છે.
આ ઉપરાંત આ વર્ષે પડેલા દુષ્કાળની અસર પણ દૂધ અને ઘીના ઉત્પાદન પર જોવા મળી રહી છે. પશુઓ માટે ચારાની અછત અને અન્ય કારણોસર દૂધનું ઉત્પાદન ઘટ્યું છે, જેની સીધી અસર ઘીના બજાર પર પડી છે.
રાજકોટ શહેર અને સૌરાષ્ટ્રના બજારોમાં મોટાભાગનું શુદ્ધ ઘી આસપાસના ગ્રામ્ય વિસ્તારોમાંથી આવે છે. પરંતુ આ વખતે પરિસ્થિતિ બદલાઈ ગઈ છે. રાજકોટની એક ખાનગી ડેરીના સંચાલકે જણાવ્યું કે દિવાળીનો સમય હોવા ઉપરાંત નકલી ઘીનું વેચાણ ઘટતાં ઓરિજિનલ ઘીના ભાવ વધ્યા છે. પહેલાં જે પ્રમાણમાં ગામડાંઓમાંથી ઘી આવતું હતું, તેની સરખામણીમાં હવે ખૂબ ઓછું ઘી બજારમાં આવી રહ્યું છે.
ગ્રામ્ય વિસ્તારોમાંથી ઘીની આવક ઘટવી અને તહેવારોની માંગ વધવી, આ બંને પરિબળોએ ભેગા મળીને અછતની સ્થિતિ ઊભી કરી છે. પરિણામે ગ્રાહકોએ મોંઘા ભાવે ઘી ખરીદવું પડ્યું છે.
આમ, એક બાજુ આરોગ્ય વિભાગની કાર્યવાહીથી લોકોના સ્વાસ્થ્ય સાથે થતાં ચેડાં અટક્યાં છે, જે સારી બાબત છે. પરંતુ બીજી બાજુ દુષ્કાળ અને તહેવારની માંગે શુદ્ધ ઘીના ભાવમાં વધારો કરી દીધો છે.