ગાંધીનગર મહાનગરપાલિકાની ચૂંટણી નજીક આવતાં શહેરમાં રાજકીય માહોલ ગરમાયો છે. વોર્ડ નંબર-૭માં કોંગ્રેસ દ્વારા લગાવવામાં આવેલા બેનરો ફાડી નાખવામાં આવ્યા હોવાના આક્ષેપથી નવો વિવાદ ઊભો થયો છે. કોંગ્રેસના નેતાઓએ આ ઘટનાનો વિરોધ કરતા તપાસની માગ કરી છે.
કોંગ્રેસના સાંસદ ગેનીબેન ઠાકોરે આ મુદ્દે જાહેર કાર્યક્રમ દરમિયાન આક્રમક નિવેદન આપ્યું હતું. તેમણે બેનર ફાડનારાઓને પડકાર આપતાં કહ્યું કે, જો કોઈમાં હિંમત હોય તો દિવસના સમયે સામે આવીને કોંગ્રેસના બેનરને હાથ લગાવીને બતાવે. ગેનીબેને એવો પણ આક્ષેપ કર્યો કે રાત્રિના અંધારામાં છુપાઈને કોંગ્રેસના પ્રચાર સામગ્રીને નુકસાન પહોંચાડવામાં આવી રહ્યું છે.
ચૂંટણીના વાતાવરણમાં આવી ઘટનાઓ ન બને તે માટે તેમણે કોંગ્રેસના કાર્યકરોને સાવધાન રહેવા જણાવ્યું હતું. સાથે જ સમગ્ર મામલાની હકીકત બહાર આવે તે માટે યોગ્ય તપાસ કરવાની માગ કરી છે.
આ મામલે કોંગ્રેસના આગેવાનોએ ગાંધીનગર રેન્જ IG સમક્ષ રજૂઆત કરી હોવાનું સામે આવ્યું છે. કોંગ્રેસે બેનરો ક્યાં અને કેવી રીતે ફાડવામાં આવ્યા તેની તપાસ માટે આસપાસના વિસ્તારોમાં લગાવવામાં આવેલા CCTV કેમેરાના ફૂટેજ તપાસવાની માગ કરી છે. કોંગ્રેસનો આક્ષેપ છે કે આવી ઘટનાઓ પાછળ ચૂંટણીનો માહોલ બગાડવાનો પ્રયાસ હોઈ શકે છે.
જોકે, કોંગ્રેસના આક્ષેપોને ભાજપ દ્વારા નકારી કાઢવામાં આવ્યા છે. ભાજપ તરફથી આ સમગ્ર મામલે કોંગ્રેસના આરોપોને રાજકીય રીતે જોવામાં આવી રહ્યા છે.
બીજી તરફ ગેનીબેન ઠાકોરે ગાંધીનગર પોલીસની કામગીરી અંગે પણ ગંભીર સવાલો ઉઠાવ્યા છે. તેમના જણાવ્યા મુજબ, રિક્ષાચાલકો, લારી-ગલ્લાવાળા, કોંગ્રેસના કાર્યકરો તેમજ સામાન્ય મતદારો પર પોલીસ દ્વારા દબાણ કરવામાં આવી રહ્યું છે. તેમણે સ્પષ્ટ શબ્દોમાં કહ્યું કે પોલીસની મુખ્ય જવાબદારી કાયદો અને વ્યવસ્થા જાળવવાની છે, કોઈ પક્ષના કાર્યકરો કે સામાન્ય નાગરિકોને ડરાવવાની કે ધમકાવવાની નહીં.
ગેનીબેન ઠાકોરના આ નિવેદન બાદ ગાંધીનગરની ચૂંટણીમાં બેનર વિવાદ અને પોલીસની કામગીરી બંને મુદ્દા ચર્ચાના કેન્દ્રમાં આવ્યા છે. ચૂંટણી નજીક આવી રહી છે તેમ રાજકીય પક્ષો વચ્ચે આરોપ-પ્રત્યારોપ વધુ તીવ્ર બનવાની શક્યતા છે. હવે બેનર ફાડવાની ઘટનાની તપાસમાં શું બહાર આવે છે અને પોલીસની કામગીરી અંગેના આક્ષેપો પર શું કાર્યવાહી થાય છે, તેના પર સૌની નજર રહેશે.