ફ્રાન્સમાં શિક્ષણ ક્ષેત્રમાં ઘટાડા અને સરકારના ખર્ચકાપના પ્રસ્તાવ સામે વિદ્યાર્થીઓનું આંદોલન હવે દેશવ્યાપી બન્યું છે. પેરિસ, માર્સેઈ, લિલ, લિયોન, નાંતે, બોર્ડો, રેન, તુલૂઝ અને સ્ટ્રાસબર્ગ સહિત અનેક શહેરોમાં વિરોધ પ્રદર્શન થયા છે. કેટલાક સ્થળોએ આગચંપી, તોડફોડ અને પોલીસ સાથે અથડામણની ઘટનાઓ બની છે. અત્યાર સુધીમાં 440થી વધુ લોકોની અટકાયત કરવામાં આવી છે, જેમાં મોટાભાગના સગીરો છે.
આ આંદોલનનું તાત્કાલિક કારણ વડાપ્રધાન સેબાસ્ટિયન લેકોર્નુની સરકારનો 5.4 લાખ કરોડ રૂપિયા (54 અબજ યુરો)નો ખર્ચકાપનો પ્રસ્તાવ છે. સરકારના અંદાજ મુજબ ફ્રાન્સનું જાહેર દેવું 2026ના મધ્ય સુધીમાં 3.596 ટ્રિલિયન યુરો (આશરે 359.6 લાખ કરોડ રૂપિયા) પહોંચ્યું છે, જે GDPના આશરે 119 ટકા છે. નિયંત્રણ નહીં આવે તો 2027 સુધીમાં તે GDPના 121.7 ટકા સુધી પહોંચી શકે છે.
સરકારના પ્રસ્તાવમાં વિવિધ સરકારી વિભાગોના ખર્ચમાં ઘટાડો, માળખાકીય વિકાસ માટેના ભંડોળમાં રોક અને શિક્ષકો સહિત સરકારી કર્મચારીઓના મૂળ પગારમાં 2027 સુધી સ્થગિતીનો સમાવેશ થાય છે. આનો વિરોધ કરતાં વિદ્યાર્થીઓ, સરકારી કર્મચારીઓ અને વિવિધ ક્ષેત્રના કામદારો રસ્તા પર ઉતર્યા છે.
માર્સેઈમાં લિસે સેન્ટ-એક્ઝ્યુપેરી નજીક વિરોધીઓએ રસ્તા પર આગ લગાવી હતી. આગ બુઝાવવા પહોંચેલી ફાયર બ્રિગેડની ગાડીને કેટલાક લોકોએ આગ ચાંપી દીધી હતી. અન્ય એક શાળામાં આગચંપીના પ્રયાસ દરમિયાન પેટ્રોલ શાળાના પ્રિન્સિપાલ અને વાઇસ પ્રિન્સિપાલ પણ દાઝ્યા હતા. પોલીસકર્મીઓ, શિક્ષકો અને વિદ્યાર્થીઓ સહિત અનેક લોકો ઘાયલ થયા છે. દેશભરમાં 400થી વધુ હાઈસ્કૂલ અને અનેક યુનિવર્સિટી કેમ્પસ બંધ રહ્યા અથવા શિક્ષણ કાર્ય ખોરવાયું છે.
વિદ્યાર્થીઓનો મુખ્ય રોષ માત્ર બજેટ સામે નથી. અનેક વર્ગખંડોમાં 34થી 38 અથવા તેનાથી વધુ વિદ્યાર્થીઓ હોવાનો દાવો કરવામાં આવી રહ્યો છે. શિક્ષકોની ખાલી જગ્યાઓને કારણે ગણિત, ભૌતિકશાસ્ત્ર અને અન્ય વિષયોના વર્ગો લાંબા સમય સુધી નિયમિત રીતે ચાલી શકતા નથી. જૂની શાળાઓમાં ગરમી સામે પૂરતી વ્યવસ્થા ન હોવાનો મુદ્દો પણ ઉઠ્યો છે. વિદ્યાર્થીઓ પોલીસની કાર્યવાહી સામે પણ નારાજગી વ્યક્ત કરી રહ્યા છે. પેરિસની એક શાળાની બહાર લગાવવામાં આવેલા બેનર પર લખવામાં આવ્યું હતું—"ઓછા પોલીસકર્મીઓ, વધુ નાણાં."
વિદ્યાર્થી આંદોલનને સરકારી કર્મચારીઓ, હોસ્પિટલ કર્મચારીઓ, જાહેર પરિવહન કર્મચારીઓ અને અન્ય ક્ષેત્રોના કામદારોનું સમર્થન મળ્યું છે. કામદાર સંગઠનોએ દેશભરમાં 170થી વધુ સંયુક્ત રેલીઓ યોજી હતી. CGT સંગઠને સરકારને ખર્ચકાપ અને પગાર સ્થગિતીનો પ્રસ્તાવ પાછો ખેંચવા માટે 48 કલાકની સમયમર્યાદા આપી છે. આંદોલનને 1968ના વિદ્યાર્થી-કામદાર વિરોધ અને 2006ના CPE વિરોધ સાથે પણ સરખાવવામાં આવી રહ્યું છે.
ફ્રાન્સ સામે હવે મોટો પડકાર એ છે કે વધતા જાહેર દેવા વચ્ચે સામાજિક અસંતોષને કેવી રીતે સંભાળવો અને સાથે સરકારી ખર્ચમાં ઘટાડો કેવી રીતે કરવો.