ફ્રાન્સમાં શાળાના વિદ્યાર્થીઓએ શિક્ષણની સ્થિતિ સામે શરૂ કરેલું આંદોલન હવે સમગ્ર દેશમાં ફેલાઈ ગયું છે. મોંઘવારી અને વધતા જીવનનિર્વાહ ખર્ચથી પરેશાન સામાન્ય લોકો પણ આ પ્રદર્શનોમાં જોડાયા છે. ગયા અઠવાડિયે થયેલી હિંસા બાદ આજે ફરી મોટાપાયે વિરોધ પ્રદર્શનોની શક્યતા છે. પરિસ્થિતિને કાબૂમાં રાખવા સરકારે દેશભરમાં આશરે 70,000 સુરક્ષાકર્મીઓ તૈનાત કર્યા છે.
ગૃહમંત્રી લોરેન્ટ નુનેઝે ચેતવણી આપી છે કે સોશિયલ મીડિયા પર હિંસા અને લૂંટફાટ ઉશ્કેરવાના સંદેશા વાઇરલ થઈ રહ્યા છે. પ્રમુખ ઇમેન્યુઅલ મેક્રોને ગુરુવારે ઉગ્ર-ડાબેરી જૂથો પર 'રિપબ્લિકને તોડી પાડવાનો' પ્રયાસ કરવાનો આરોપ લગાવ્યો હતો અને ગુનાહિત પ્રવૃત્તિઓ સામે સખતમાં સખત કાર્યવાહી કરવાનો આદેશ આપ્યો હતો. ન્યાય મંત્રી ગેરાર્ડ દારમાનિને જણાવ્યું કે ગયા શનિવારે થયેલી લૂંટફાટ અને તોડફોડના મામલે કોર્ટે અત્યાર સુધીમાં 217 લોકોને જેલમાં મોકલ્યા છે.
મેક્રોને શુક્રવારે માધ્યમિક શાળાના વિદ્યાર્થીઓના પ્રતિનિધિઓ સાથે બેઠક કરી હતી, પરંતુ વિદ્યાર્થીઓએ માંગણીઓનો ઉકેલ ન આવે ત્યાં સુધી પ્રદર્શનો ચાલુ રાખવાની હાકલ કરી છે.
વહીવટીતંત્રે પેરિસ, લિયોન અને ઓર્લિયન્સ જેવા મુખ્ય શહેરોના મધ્ય ભાગોમાં પ્રદર્શનો પર પ્રતિબંધ મૂક્યો છે. ઓર્લિયન્સમાં જમણેરી નેતા મરીન લે પેનની પાર્ટીના સંમેલન સામે વિરોધ પ્રદર્શન યોજાવાની શક્યતા છે. સુરક્ષા ચિંતાઓને કારણે પેરિસમાં વિશ્વપ્રસિદ્ધ 'લૂવ્ર મ્યુઝિયમ' સહિતના સ્થળો શનિવારે બંધ રાખવામાં આવ્યા છે. જોકે, એમનેસ્ટી ઇન્ટરનેશનલ અને હ્યુમન રાઇટ્સ વોચ જેવી સંસ્થાઓએ પ્રદર્શનો પર મૂકાયેલા પ્રતિબંધો અને શાંતિપૂર્ણ આંદોલનકર્તાઓ સામે પોલીસ કાર્યવાહીની ટીકા કરી છે.
આ હિંસા અને અશાંતિ વચ્ચે ફ્રાન્સમાં આગામી પ્રમુખ ચૂંટણી પહેલા રાજકીય ગરમાવો વધી ગયો છે. તાજેતરના પોલ અનુસાર, ફાર-રાઈટ નેતા મરીન લે પેનની લોકપ્રિયતામાં મોટો ઉછાળો આવ્યો છે અને તેઓ પ્રમુખપદની રેસમાં સૌથી આગળ ચાલી રહ્યા છે. ઓપિનિયન પોલમાં દાવો કરાયો છે કે ચૂંટણીના પ્રથમ તબક્કામાં મરીન લે પેન 33થી 35 ટકા મતો સાથે આગળ રહી શકે છે અને બીજા તબક્કામાં તેઓ સરળતાથી જીત મેળવી શકે છે.