ફૂડ ડિલિવરી એપ ખોલો કે તરત જ નજર ડિસ્કાઉન્ટ પર જાય છે. 30% ઑફ, 40% ઑફ, ક્યારેક 50% કે તેથી વધુની ઓફર પણ દેખાય છે. પણ શું વધારે ટકાવારીનું ડિસ્કાઉન્ટ એટલે હંમેશા સસ્તું ખાવાનું મળે જ તેવી ખાતરી? જરૂરી નથી. સોશિયલ મીડિયા પર યુઝર્સ આવા સવાલો ઘણી વાર પૂછતા હોય છે.
ડિસ્કાઉન્ટ પહેલાં વાનગીની કિંમત વધારવાની એપની રીત
ધારો કે એક વાનગીની રેસ્ટોરન્ટમાં કિંમત 200 રૂપિયા છે. એ જ વાનગી ફૂડ એપ પર 320 રૂપિયામાં દેખાય છે. હવે જો 100 રૂપિયાની છૂટ મળે તો કિંમત 220 રૂપિયા થાય. એટલે કે 320 રૂપિયા પર 100 રૂપિયાની છૂટ મોટી લાગે, પણ રેસ્ટોરન્ટના 200 રૂપિયાના મેનૂ સાથે સરખાવો તો ગ્રાહક હજુ 20 રૂપિયા વધારે ચૂકવે છે. આથી માત્ર ડિસ્કાઉન્ટની ટકાવારી જોઈને ઓર્ડર કરવો યોગ્ય નથી.
બિલમાં જોડાતા અન્ય ચાર્જિસ
ફૂડ એપ પર વાનગીની દેખાડવામાં આવેલી કિંમત જ તમારું પૂરું બિલ હોતું નથી. ઓર્ડર કરતી વખતે ડિલિવરી ફી, પેકેજિંગ કે હેન્ડલિંગ ચાર્જ, પ્લેટફોર્મ ફી અને બીજા ચાર્જિસ પણ જોડાઈ શકે છે.
ઝોમેટોની શરતો શું કહે છે
ઝોમેટોની પ્રવર્તમાન શરતો મુજબ, પ્લેટફોર્મ પર દેખાડવામાં આવેલી કિંમત રેસ્ટોરન્ટ પાર્ટનર તરફથી આપવામાં આવે છે. તેમાં પેકેજિંગ કે હેન્ડલિંગ ચાર્જ સામેલ હોઈ શકે છે. કંપની એમ પણ કહે છે કે ડિલિવરી ચાર્જ ઓર્ડરના હિસાબે બદલાઈ શકે છે. તેમાં અંતર, ઓર્ડરની રકમ અને દિવસના સમય જેવા પરિબળો સામેલ હોઈ શકે છે.
સ્વિગી પરના વધારાના ચાર્જિસ
સ્વિગીની શરતોમાં પણ ડિલિવરી ફી ઉપરાંત હેન્ડલિંગ, સુવિધા, પ્લેટફોર્મ, પેકેજિંગ, નાના ઓર્ડર અને કેટલીક પરિસ્થિતિઓમાં સર્જ ચાર્જિસનો ઉલ્લેખ છે. લાગુ ચાર્જ ચેકઆઉટ વખતે દેખાડવામાં આવે છે.
ડિસ્કાઉન્ટ પછી પણ બિલ વધવાની ગણતરી
ધારો કે એપ પર વાનગીની કિંમત 320 રૂપિયા છે. 100 રૂપિયાની છૂટ પછી 220 રૂપિયા થાય. હવે તેમાં ડિલિવરી ફી અને બીજા લાગુ ચાર્જ જોડાય તો અંતિમ બિલ 220 રૂપિયાથી વધારે થઈ શકે. એટલે સ્ક્રીન પર દેખાતું ડિસ્કાઉન્ટ અને ખિસ્સામાંથી જતી અંતિમ રકમ, બંને અલગ વસ્તુઓ છે. આથી કોઈ પણ ઓફર સમજવાની સૌથી સરળ રીત એ છે કે ડિસ્કાઉન્ટ પછી ચૂકવવાપાત્ર અંતિમ રકમ કેટલી છે તે જોવું.
રેસ્ટોરન્ટ અને પ્લેટફોર્મ વચ્ચે કિંમત સમાન રાખવાનો નિયમ
અહીં એક જરૂરી વાત સમજવી પણ જરૂરી છે. ઝોમેટોની ઓનલાઈન ઓર્ડરિંગ સાથે જોડાયેલી રેસ્ટોરન્ટ પાર્ટનર શરતોમાં કહેવામાં આવ્યું છે કે રેસ્ટોરન્ટે પોતાના સીધા ચેનલની સરખામણીમાં પ્લેટફોર્મ પર કિંમત સમાન અથવા ઓછી રાખવી જોઈએ. તેમાં જમવાની કિંમત અને પેકેજિંગ જેવા શુલ્ક પણ સામેલ કરવામાં આવ્યા છે.
કિંમતોની ખાતરી માટે ઓરિજિનલ મેનૂ સાથે સરખામણી કરો
ઝોમેટોની ગ્રાહક શરતોમાં એમ પણ કહેવામાં આવ્યું છે કે પ્લેટફોર્મ પર દેખાડવામાં આવેલી કિંમત રેસ્ટોરન્ટ પાર્ટનર પાસેથી મળેલી માહિતીના આધારે હોય છે અને પેકેજિંગ કે હેન્ડલિંગ ચાર્જ તેમાં સામેલ હોઈ શકે છે. તેથી માત્ર એક રેડિટ પોસ્ટના આધારે એવું કહેવું યોગ્ય નથી કે તમામ રેસ્ટોરન્ટ એપ પર કિંમત વધારીને પછી ડિસ્કાઉન્ટ આપે છે. જો કોઈ વાનગીની કિંમત અલગ દેખાય તો રેસ્ટોરન્ટના મેનૂ સાથે સરખામણી કરવી સારી.