ફ્લાયદુબઇની ફ્લાઇટ FZ1073માં 30 સપ્ટેમ્બર 2026ના રોજ થયેલી ઘટના પર નવો પ્રકાશ પડ્યો છે. કેપ્ટન સ્મિત મચ્છર પર કો-પાઇલટ હમામ અલ-હમ્મામીએ હુમલો કર્યો હતો. હમામનો હેતુ વિમાનને ઈઝરાયલ તરફ લઈ જઈને ક્રેશ કરવાનો હતો. જોકે, કેપ્ટન સ્મિત મચ્છરની સૂઝબૂઝથી 170થી વધુ મુસાફરોનો જીવ બચી ગયો.
તપાસ એજન્સીઓએ જણાવ્યું છે કે ઘટના પહેલાં છ રેડ ફ્લેગ ચૂકાયા હતા. હમામ અલ-હમ્મામીના પિતા ઓમાની અને માતા સિરિયાના છે. તેના સોશિયલ મીડિયા પર અલકાયદા સાથેનું જોડાણ દર્શાવતા પુરાવા મળ્યા હતા. રોયટર્સના અહેવાલ મુજબ, હમામે ફ્લાયદુબઇમાં નોકરી મળતાં પહેલાં જ આ પ્લાન બનાવી લીધો હતો. એક વખત પ્લેનમાં તેનો મિત્ર હોવાનું જાણ્યા બાદ તેણે પ્લાન રદ કર્યો હતો, પરંતુ પછી ફરી તેને અમલમાં મૂક્યો.
હાલ કેપ્ટન સ્મિત મચ્છર અબુધાબીની મિલિટરી હોસ્પિટલમાં સારવાર હેઠળ છે. તેમને હાથ-પગ, છાતી અને પેટના નીચેના ભાગમાં ગંભીર ઈજાઓ થઈ છે. ડોક્ટરોની ખાસ ટીમ તેમની સતત દેખરેખ રાખી રહી છે. UAEમાં ભારતના રાજદૂત દીપક મિત્તલે હોસ્પિટલમાં મુલાકાત લીધી હતી. તેમણે જણાવ્યું કે સ્મિત ઝડપથી સાજા થઈ રહ્યા છે. પરિવારજનોને પણ મુલાકાત કરવા દેવામાં આવી છે.
આ ઘટના એવિએશન સુરક્ષા વ્યવસ્થામાં રહેલી ખામીઓ તરફ ધ્યાન દોરે છે. દુબઈથી તેલ અવીવ જતી ફ્લાઇટમાં કો-પાઇલટે કેવી રીતે હુમલો કરી શક્યો? શું એરપોર્ટ સુરક્ષા અને એજન્સીઓની ચકાસણીમાં ક્યાંક ઢીલ રહી ગઈ? આ પ્રશ્નોનો જવાબ શોધવો જરૂરી છે.
ઉલ્લેખનીય છે કે ઓમાની પાઈલટ દ્વારા આ જ વર્ષે તેલ અવીવની ફ્લાઈટને હાઈજેક કરીને ક્રેશ કરવાનો પ્લાન હતો, પણ તે થઈ શક્યો નહીં. આ ઘટના બાદ તપાસ અરબ દેશોથી લઈને ઓસ્ટ્રેલિયા અને ન્યૂઝીલેન્ડ સુધી પહોંચી છે.