દુબઈથી તેલ અવીવ જઈ રહેલી ફ્લાયદુબઈની ફ્લાઇટમાં ભારતીય પાઇલટ કેપ્ટન સ્મિત મચ્છર પર છરી વડે હુમલો કરનાર કો-પાઇલટની ઓળખ હમામ અલ હમામી તરીકે થઈ છે. તે ઓમાનનો રહેવાસી છે. સાઉદી અરેબિયાની ન્યૂઝ એજન્સી અલ અરેબિયા ઇંગ્લિશના અહેવાલ મુજબ, તે લાંબા સમય સુધી સીરિયામાં રહ્યો હતો, જ્યાં તેના કટ્ટરપંથી વિચારોનો પ્રભાવ પડ્યો હોવાનું સામે આવ્યું છે.
ઇઝરાયલના ચેનલ 12ના અહેવાલ મુજબ, તપાસકર્તાઓને તેના પર અલ-કાયદાની વિચારધારાથી પ્રભાવિત હોવાના પુરાવા મળ્યા છે. i24 ન્યૂઝે સૂત્રોને ટાંકીને દાવો કર્યો છે કે પૂછપરછ દરમિયાન અલ હમામીએ જણાવ્યું કે તે વિમાનને ઇઝરાયલમાં ક્રેશ કરાવવા માગતો હતો.
હુમલા પહેલાં પણ તેના વલણને લઈને સવાલો ઉઠ્યા હતા. સીએનએન મુજબ, 2024માં તેને ઓમાનની રાષ્ટ્રીય એરલાઇનમાં પાઇલટ તાલીમમાંથી હટાવી દેવામાં આવ્યો હતો. ત્યારબાદ તેને એરલાઇનમાં બીજી જવાબદારી સોંપવામાં આવી હતી. આશરે 8 મહિના પહેલાં તે ફ્લાયદુબઈ સાથે જોડાયો હતો. 30 સપ્ટેમ્બરે તેણે ફ્લાઇટના કોકપિટમાં કેપ્ટન મચ્છર પર છરી વડે હુમલો કર્યો હતો.
હુમલા બાદ વિમાન ઝડપથી નીચે જવા લાગ્યું. ગંભીર રીતે ઘાયલ કેપ્ટન મચ્છરે હુમલાખોરનો સામનો કરતાં કોકપિટનો દરવાજો ખોલી દીધો. ત્યારબાદ મુસાફરો અને ક્રૂ મેમ્બર્સે અંદર જઈને કો-પાઇલટને કાબૂમાં લીધો. વિમાનનું સાઉદી અરેબિયામાં ઇમરજન્સી લેન્ડિંગ કરાવવામાં આવ્યું.
હુમલામાં કેપ્ટન સ્મિત મચ્છર ગંભીર રીતે ઘાયલ થયા હતા. લોહીલુહાણ હાલતમાં ઓક્સિજન માસ્ક પહેરેલો તેમનો વીડિયો સામે આવ્યો હતો.
અલ અરેબિયા ઇંગ્લિશના અહેવાલ મુજબ, અલ હમામીએ ઓમાનની બહાર ઘણો સમય વિતાવ્યો હતો અને સીરિયામાં પણ લાંબા સમય સુધી રહ્યો હતો. સૂત્રોનો દાવો છે કે ત્યાં જ તે કટ્ટરપંથી વિચારોથી પ્રભાવિત થયો હતો.
ચેનલ 12ના અહેવાલ મુજબ, તપાસમાં તેના કેટલાક ધાર્મિક લોકો સાથે મુલાકાતની માહિતી પણ સામે આવી છે. એજન્સીઓ એ જાણવાનો પ્રયાસ કરી રહી છે કે તે કયા રીતે કટ્ટરપંથી વિચારોના પ્રભાવ હેઠળ આવ્યો.
ફોક્સ ન્યૂઝના જણાવ્યા મુજબ, એક સૂત્રએ દાવો કર્યો કે ઓમાન એરે 2024માં અલ હમામીને ફ્લાઇટમાંથી ઉતારી દીધો હતો. તેના દ્વારા કટ્ટરપંથી ઇસ્લામિક વેબસાઇટ્સ જોવાની માહિતી સામે આવ્યા બાદ આ પગલું લેવામાં આવ્યું હતું.
સીએનએનના જણાવ્યા મુજબ, કથિત કટ્ટરપંથી વિચારોને કારણે તેને પાઇલટ તાલીમમાંથી દૂર કરવામાં આવ્યો હતો. જોકે, બાદમાં તેને એરલાઇનમાં બીજી ભૂમિકા આપવામાં આવી હતી. તે અગાઉ રોયલ એર મેરોક સાથે પણ કામ કરી ચૂક્યો હતો.
i24 ન્યૂઝે અમીરાતી સૂત્રને ટાંકીને જણાવ્યું કે અલ હમામીના સામાનમાંથી ‘ફ્રી પેલેસ્ટાઇન’ જૂથોના પત્રિકાઓ અને પેલેસ્ટાઇન સમર્થક અન્ય સામગ્રી મળી આવી હતી. અહેવાલ મુજબ, તે પેલેસ્ટિનિયનોના સમર્થન અને ઇઝરાયલના વિરોધમાં પણ વાત કરતો હતો.
તપાસ એજન્સીઓ આ સામગ્રી અને તેના નિવેદનોને તેના કથિત કટ્ટરપંથ તથા સંભવિત આતંકવાદી હેતુની તપાસના ભાગરૂપે જોઈ રહી છે.
i24 ન્યૂઝે તપાસ સાથે સંકળાયેલા સૂત્રોને ટાંકીને દાવો કર્યો કે અલ હમામીએ પૂછપરછ દરમિયાન વિમાનને ઇઝરાયલમાં ક્રેશ કરવાની વાત કહી હતી. તપાસ એજન્સીઓ એ જાણવાનો પ્રયાસ કરી રહી છે કે શું કૅપ્ટન પરનો હુમલો વિમાન પર કબજો કરીને તેને જાણીજોઈને તોડી પાડવાના પ્રયાસનો ભાગ હતો.
કેપ્ટન સ્મિત મચ્છરને સાઉદીમાં વિમાન લેન્ડ થયા બાદ સારવાર માટે લઈ જવામાં આવ્યા.
ફ્લાઇટ FZ1073માં ઉડાન ભર્યાના લગભગ અઢી કલાક બાદ અલ હમામીએ કેપ્ટન મચ્છર પર છરી વડે હુમલો કર્યો. ફ્લાઇટરડાર24 મુજબ, આ દરમિયાન વિમાન લગભગ એક મિનિટમાં 33 હજાર ફૂટથી ઘટીને 17 હજાર ફૂટની ઊંચાઈએ આવી ગયું.
ગંભીર ઈજાઓ છતાં કેપ્ટન મચ્છરે હુમલાખોરનો સામનો કર્યો અને કોકપિટનો દરવાજો ખોલી દીધો. ત્યારબાદ ક્રૂ સભ્યો અને મુસાફરોએ આરોપીને કાબૂમાં લીધો. ફરજ પર ન રહેલા બે પાઇલટોએ પણ વિમાનનું સંચાલન સંભાળવામાં મદદ કરી.
હુમલા બાદ વિમાનનું સાઉદી અરેબિયાના તબુકમાં ઇમરજન્સી લેન્ડિંગ કરાવવામાં આવ્યું. ઘટનાના સમયે વિમાનમાં 174 લોકો સવાર હતા. તેમાં મોટાભાગના ઇઝરાયલી મુસાફરો હતા. ભારત અને UAEના નાગરિકો પણ વિમાનમાં હાજર હતા.
અમેરિકન વિદેશ વિભાગના જણાવ્યા અનુસાર, ચાર મુસાફરો અમેરિકન નાગરિક હતા. કેપ્ટન મચ્છર ગંભીર રીતે ઘાયલ થયા હતા.