વાસ્તુ શાસ્ત્ર હિન્દુ ધર્મમાં મહત્વનું સ્થાન ધરાવે છે. ઘરમાં ક્યાં મુખ્ય દરવાજો હોવો જોઈએ, રસોડું કઈ દિશામાં હોવું જોઈએ, પૂજા ઘર અને બાથરૂમ કઈ દિશામાં યોગ્ય છે — આ બધાનું ધ્યાન રાખવું જરૂરી મનાય છે. નિયમોનું પાલન ન થાય તો ઘરમાં વાસ્તુ દોષ મનાય છે, જેની સીધી અસર પરિવારના સભ્યોની પ્રગતિ અને સ્વાસ્થ્ય પર પડે છે.
જે લોકો સ્વતંત્ર મકાનમાં રહે છે તેઓ પોતાની અનુકૂળતા મુજબ થોડી તોડફોડ કરીને વાસ્તુ દોષ સુધારી શકે છે. પણ ફ્લેટમાં રહેતા લોકો માટે કોઈ પણ તોડફોડ સહેલી નથી હોતી. તમે પણ ફ્લેટમાં રહો છો અને વાસ્તુ દોષ દૂર કરવા માંગો છો, તો અહીં કેટલાક સરળ ઉપાયો છે.
મુખ્ય પ્રવેશદ્વાર: ફ્લેટનો મુખ્ય દરવાજો પૂર્વ, ઉત્તર કે ઉત્તર-પૂર્વ (ઈશાન) દિશામાં હોવો શુભ મનાય છે. દરવાજો ઘરના અન્ય દરવાજાઓ કરતાં કદમાં મોટો હોવો જોઈએ. જો દરવાજો ખોટી દિશામાં હોય તો તેના ઉપર ભાગે પંચમુખી હનુમાનજીની તસવીર કે પ્રતીક લગાવી શકાય.
રસોડું: રસોડા માટે દક્ષિણ-પૂર્વ (અગ્નિ) અથવા ઉત્તર-પશ્ચિમ (વાયવ્ય) દિશા શ્રેષ્ઠ છે. રસોઈ બનાવતી વખતે મુખ પૂર્વ દિશા તરફ રહેવું જોઈએ. ઈશાન ખૂણામાં રસોડું ન હોવું જોઈએ.
માસ્ટર બેડરૂમ: બેડરૂમ માટે દક્ષિણ કે દક્ષિણ-પશ્ચિમ (નૈઋત્ય) દિશા ઉત્તમ મનાય છે, જેનાથી સ્થિરતા અને માનસિક શાંતિ મળે છે. પલંગની બરાબર સામે કાચ કે અરીસો ન લગાવવો, કારણ કે તેનાથી નકારાત્મક ઊર્જા પરાવર્તિત થાય છે. બેડરૂમ ચોરસ કે લંબચોરસ હોવો જોઈએ.
પૂજા ઘર: પૂજા સ્થળ ઉત્તર-પૂર્વ (ઈશાન) દિશામાં હોવું જોઈએ. મૂર્તિઓનું મુખ પશ્ચિમ કે પૂર્વ તરફ રહેવું જોઈએ; દક્ષિણ તરફ ક્યારેય ન રાખવું.
બાલ્કની અને બારીઓ: ઉત્તર અને પૂર્વ દિશાની બાલ્કની શુભ મનાય છે, કારણ કે તેનાથી ઘરમાં તાજી હવા અને સવારનો તડકો આવે છે. પૂર્વ દિશાની બાલ્કનીમાં લીલા છોડ લગાવવાથી ઘરમાં નવી ઊર્જા આવે છે.
તોડફોડ વગરના ઉપાય: ઈશાન ખૂણામાં સ્વચ્છ કાચના બાઉલ કે ફ્લાવરવાઝમાં તાજું પાણી ભરીને મૂકો અને દરરોજ બદલતા રહો. ધન વૃદ્ધિ માટે દક્ષિણ-પૂર્વ ખૂણામાં 'સિક્કા પર બેઠેલા ઘુવડ'નો શો-પીસ રાખવો શુભ મનાય છે.
નોંધ: આ ઉપાયો ધાર્મિક આસ્થા અને લોકમાન્યતાઓ પર આધારિત છે, જેનો કોઈ વૈજ્ઞાનિક પુરાવો નથી.