સોશિયલ મીડિયા પર છેલ્લા કેટલાક દિવસથી એક જાહેરનામું ઝડપથી ફેલાઈ રહ્યું છે, જેમાં દાવો કરવામાં આવ્યો છે કે કેન્દ્ર સરકારે દેશની તમામ જાહેર ક્ષેત્રની બેંકો માટે દર શનિવારે રજા જાહેર કરી છે. આ દાવો તદ્દન ખોટો છે.
વાયરલ થઈ રહેલા આ જાહેરનામામાં ‘ગેઝેટ ઓફ ઈન્ડિયા’નો એક અંશ દર્શાવવામાં આવ્યો છે. તેમાં લખ્યું છે કે નેગોશિયેબલ ઇન્સ્ટ્રુમેન્ટ્સ એક્ટ, 1881ની કલમ 25 હેઠળ મળેલી સત્તાનો ઉપયોગ કરીને, જાહેર હિતમાં, સ્ટેટ બેંક ઓફ ઇન્ડિયા સહિત તમામ જાહેર ક્ષેત્રની બેંકોની તમામ શાખાઓ માટે દર શનિવારને સાપ્તાહિક રજા તરીકે જાહેર કરવામાં આવે છે. આ જાહેરનામું તાત્કાલિક અસરથી અમલમાં આવશે તેવો દાવો પણ તેમાં કરવામાં આવ્યો છે.
જો કે, પ્રેસ ઇન્ફર્મેશન બ્યુરો (PIB)ના ફેક્ટ ચેક વિભાગે આ દાવાને સ્પષ્ટપણે નકારી કાઢ્યો છે. તેમણે જણાવ્યું છે કે આ દસ્તાવેજ નકલી છે અને નાણા મંત્રાલય (વિત્તીય સેવાઓ વિભાગ) દ્વારા આવું કોઈ જાહેરનામું બહાર પાડવામાં આવ્યું નથી. જાહેર ક્ષેત્રની બેંકો માટે દર શનિવારે રજા જાહેર કરતું કોઈ પણ સત્તાવાર નોટિફિકેશન અસ્તિત્વમાં નથી.
PIB ફેક્ટ ચેકે નાગરિકોને અપીલ કરી છે કે તેઓ કેન્દ્ર સરકાર સંબંધિત કોઈ પણ શંકાસ્પદ સામગ્રી સામે સાવધાન રહે અને તેને ચકાસણી માટે મોકલે. શંકાસ્પદ સામગ્રી WhatsApp નંબર +91 8799711259 પર અથવા factcheck@pib.gov.in પર ઈમેલ દ્વારા મોકલી શકાય છે.
ઉલ્લેખનીય છે કે, બેંક યુનિયનોએ તાજેતરમાં અઠવાડિયામાં પાંચ દિવસ કામકાજની માંગ સાથે હડતાળની જાહેરાત કરી હતી. ‘ઇન્ડિયન બેંક્સ એસોસિએશન’ (IBA) સાથેની બેઠક બાદ આ પગલું મુલતવી રાખવામાં આવ્યું હતું. આ માંગના પગલે જ સોશિયલ મીડિયા પર શનિવારે બેંકો બંધ રહેવાની અફવાઓને વેગ મળ્યો હોવાનું મનાય છે.