ઓનલાઇન ખરીદી કરતા ગ્રાહકો માટે એક મહત્વપૂર્ણ સમાચાર છે. આવતા વર્ષે જાન્યુઆરીથી ઈ-કોમર્સ કંપનીઓએ પ્રોડક્ટ પર ડિસ્કાઉન્ટ આપતી વખતે તેની મૂળ કિંમત અને અગાઉની કિંમત બંને દર્શાવવી પડશે. આ નિયમ તહેવારો દરમિયાન ચાલતા મોટા સેલ પર પણ લાગુ થશે.
કન્ઝ્યુમર અફેર્સ વિભાગે ગુરુવારે (10 સપ્ટેમ્બર) કન્ઝ્યુમર પ્રોટેક્શન (ઈ-કોમર્સ) રૂલ્સમાં વ્યાપક સુધારા જાહેર કર્યા છે. આ નવા નિયમોનો મુખ્ય હેતુ ઓનલાઇન ખરીદીમાં કિંમતો અંગે વધુ પારદર્શિતા લાવવાનો છે, જેથી ગ્રાહકોને છેતરપિંડીથી બચાવી શકાય.
નવા નિયમો અનુસાર, પ્રોડક્ટની 'અગાઉની કિંમત' એટલે ડિસ્કાઉન્ટ આપવા પહેલાંના 30 દિવસ દરમિયાન પ્રોડક્ટ જે સૌથી ઓછી કિંમતે વેચાઈ હોય તે કિંમત. આ જોગવાઈ ગ્રાહકોને પ્રોડક્ટની વાસ્તવિક ડિસ્કાઉન્ટ કિંમત અંગે સ્પષ્ટતા આપશે.
આ ઉપરાંત, નવા નિયમો હેઠળ સ્પોન્સર્ડ લિસ્ટિંગ, સર્ચ રિઝલ્ટમાં હેરફેર અને ડાર્ક પેટર્ન્સ અંગે પણ કડક જોગવાઈ કરવામાં આવી છે. ઈ-કોમર્સ કંપનીઓને એવી રીતે સર્ચ રિઝલ્ટમાં ફેરફાર કરવા પર રોક લગાવવામાં આવી છે, જેથી ગ્રાહકો ગેરમાર્ગે દોરાય નહીં અથવા તેમની સર્ચ ક્વેરી સાથે સંબંધિત પરિણામોની પ્રાસંગિકતા અસરગ્રસ્ત ન થાય. વધુમાં, સ્પોન્સર્ડ લિસ્ટિંગ પર સ્પષ્ટ અને સરળતાથી દેખાય તેવી માહિતી આપવી ફરજિયાત રહેશે, જેથી ગ્રાહકો પેઈડ પ્રમોશન અને સામાન્ય ઓર્ગેનિક સર્ચ રિઝલ્ટ વચ્ચેનો તફાવત સરળતાથી સમજી શકે.
જો ગ્રાહકોને ઈ-કોમર્સ પ્લેટફોર્મ પર દર્શાવવામાં આવેલી કિંમતોમાં કોઈ ગેરરીતિ કે વિસંગતતા જોવા મળે, તો તેઓ નેશનલ કન્ઝ્યુમર હેલ્પલાઈન (NCH) પર ફરિયાદ કરી શકે છે. આ નવા નિયમોથી ગ્રાહકોને ઓનલાઈન ખરીદી દરમિયાન વધુ પારદર્શિતા મળવાની અપેક્ષા છે.