અમેરિકાના મિશિગન રાજ્યમાં ગુરુવારે એક F-16 ફાઇટર જેટ તાલીમ મિશન દરમિયાન ક્રેશ થયું હતું. આ ઘટના ગ્રાન્ડ ટ્રેવર્સ કાઉન્ટીના ગ્રામ્ય વિસ્તારમાં બ્લેયર ટાઉનશીપ પાસે બની હતી.
વિમાનમાં સવાર પાયલટે સમયસૂચકતા દાખવીને જમીન સાથે અથડાય તે પહેલાં જ ઇજેક્શન કરી લીધું હતું અને પેરાશૂટની મદદથી સુરક્ષિત બહાર આવી ગયો હતો. સ્થાનિક અધિકારીઓના જણાવ્યા મુજબ, પાયલટને સારવાર માટે હોસ્પિટલમાં ખસેડવામાં આવ્યો છે.
આ F-16 વિમાન ટેક્સાસ એર નેશનલ ગાર્ડની 149મી ફાઇટર વિંગ સાથે જોડાયેલું હતું અને મિશિગનમાં ચાલી રહેલા નિયમિત તાલીમ મિશનનો ભાગ હતું. આ તાલીમ અલ્પેના ખાતેના નેશનલ ગાર્ડ કોમ્બેટ રેડીનેસ ટ્રેનિંગ સેન્ટર સાથે સંકળાયેલી હતી.
દુર્ઘટનાનું કારણ હજુ સ્પષ્ટ થયું નથી, પરંતુ એર ટ્રાફિક કંટ્રોલ સાથેની રેડિયો વાતચીતના આધારે વિમાન પક્ષી સાથે અથડાયું હોવાની શક્યતા વ્યક્ત કરવામાં આવી છે.
વિમાન ક્રેશ થયા બાદ સુરક્ષાના ભાગરૂપે આસપાસના વિસ્તારમાં પ્રતિબંધો લગાવવામાં આવ્યા હતા. F-16ની ઇમરજન્સી પાવર સિસ્ટમમાં 'હાઇડ્રાઝિન' નામના ઝેરી રસાયણનો ઉપયોગ થતો હોવાથી, શરૂઆતમાં લોકોને ઘરમાં રહેવાની સૂચના અપાઈ હતી અને બાદમાં ક્રેશ સાઇટની આસપાસ એક માઇલના વિસ્તારને ખાલી કરાવવામાં આવ્યો હતો.
રાહત અને બચાવ ટીમોએ સ્થળ પર તાત્કાલિક કામગીરી શરૂ કરી હતી. સદનસીબે, જમીન પર અન્ય કોઈ વ્યક્તિ ઘાયલ થયાના અહેવાલ નથી.