દેશમાં ઇલેક્ટ્રિક વાહનો (EV)ની માંગ ઝડપથી વધી રહી છે અને વેચાણમાં પણ નોંધપાત્ર વધારો થયો છે. પરંતુ આ વૃદ્ધિ પાછળ ડીલરોના નફામાં અપેક્ષિત વધારો થયો નથી. ડીલરોનું કહેવું છે કે EVના વધતા વેચાણ છતાં તેમની કમાણીમાં ઘટાડો થયો છે, કારણ કે પરંપરાગત પેટ્રોલ-ડીઝલ વાહનોની જેમ EVમાં સર્વિસિંગ અને સ્પેરપાર્ટ્સમાંથી મોટી આવક થતી નથી.
પેટ્રોલ અને ડીઝલ વાહનોમાં ડીલરોની આવકનો મોટો હિસ્સો સર્વિસિંગ અને સ્પેરપાર્ટ્સના વેચાણમાંથી આવે છે. જ્યારે EVમાં એન્જિનના હજારો મૂવિંગ પાર્ટ્સ, ગિયરબોક્સ, સ્પાર્ક પ્લગ અને એન્જિન ઓઇલ જેવા ઘટકો હોતા નથી. પરિણામે, ગ્રાહકો સર્વિસિંગ માટે આવે ત્યારે ખર્ચ ખૂબ ઓછો થાય છે અને ડીલરોને વર્કશોપમાંથી થતી કમાણી લગભગ નહિવત્ બને છે.
વધુમાં, EV ડીલરશિપ શરૂ કરવી અને ચલાવવી પેટ્રોલ વાહનોની તુલનામાં ઘણી ખર્ચાળ છે. ઓટો કંપનીઓના કડક નિયમો હેઠળ ડીલરોએ શોરૂમમાં હાઇ-પાવર ફાસ્ટ ચાર્જિંગ સ્ટેશન લગાવવું પડે, તાલીમબદ્ધ ટેકનિકલ સ્ટાફ રાખવો પડે અને આગ સામે સુરક્ષા માટે મોંઘી આધુનિક વ્યવસ્થા કરવી પડે. આ ઉપરાંત, બેટરી જેવી ભારે અને મોંઘી ઇન્વેન્ટરી સ્ટોકમાં રાખવા માટે વધુ વર્કિંગ કેપિટલ અને બેંક લોનના વ્યાજનો બોજ પણ ડીલરોને ઉઠાવવો પડે છે.
ઓટો કંપનીઓ EVની શરૂઆતની કિંમત ઓછી રાખવા માટે ડીલરોને આપવામાં આવતું કમિશન અથવા માર્જિન ખૂબ ઓછું રાખે છે. આ ઉપરાંત શોરૂમનું ભાડું, વીજળીનું બિલ, કર્મચારીઓના પગાર અને માર્કેટિંગના વધતા ખર્ચને પૂરા કર્યા પછી ડીલરોનો નેટ પ્રોફિટ ખૂબ ઓછો રહે છે. ઘણા નાના અને મધ્યમ ડીલરો તો માત્ર ગાડીઓ વેચવાને બદલે પોતાના રોજિંદા ખર્ચ કાઢવામાં જ સંઘર્ષ કરી રહ્યા છે.
ઓટો નિષ્ણાતો માને છે કે જો ઓટોમોબાઇલ કંપનીઓએ સમયસર ડીલરોના કમિશન, વોરંટી ક્લેમની ચુકવણી અને વર્કશોપ સપોર્ટમાં સુધારો નહીં કર્યો તો આગામી સમયમાં ડીલરોનો ઉત્સાહ આ સેગમેન્ટમાંથી ઘટી શકે છે. જોકે, જેમ બજાર વિસ્તરશે અને ચાર્જિંગ ઇન્ફ્રાસ્ટ્રક્ચર તથા સેકન્ડ-હેન્ડ EV બજારમાં સુધારો થશે, ત્યારે સ્થિતિ બદલાઈ શકે છે. હાલમાં શરૂઆતના તબક્કામાં આ બિઝનેસ ડીલરો માટે ખોટનો સોદો સાબિત થઈ રહ્યો છે.