ઇથોપિયામાં બંધક બનાવાયેલા મહેસાણા-ગાંધીનગરના ત્રણ યુવકોને સહીસલામત મુક્ત કરાવાયા છે. વિદેશ મંત્રાલયના પ્રયાસોથી તેઓ ખંડણી ચૂકવ્યા વગર મુક્ત થયા છે અને આજે પરિવાર સાથે ઘરે પહોંચશે.
આ ઘટના ઉત્તર ગુજરાતના મહેસાણા અને ગાંધીનગર વિસ્તારના યુવકો સાથે જોડાયેલી છે, જેઓ ઇથોપિયામાં કામ અર્થે ગયા હતા.
બીજી તરફ, અમદાવાદની નિરમા યુનિવર્સિટીમાં શ્રમિક સાથેની બિભત્સ ઘટનાના વિરોધમાં એક હજારથી વધુ વિદ્યાર્થીઓએ કાળા કપડાં પહેરીને બ્લેક ડે ઉજવ્યો હતો. વિદ્યાર્થીઓએ પ્લેકાર્ડ સાથે વિરોધ કર્યો અને આરોપી સામે કાર્યવાહી ન થવાનો આક્ષેપ કર્યો હતો.
રાજ્યભરમાં નવા ગુજરાત ભાડા વિધેયક સામે વકીલોએ વિરોધ પ્રદર્શન કર્યું હતું. સુરત અને વડોદરામાં કોર્ટનું કામકાજ ઠપ્પ રહ્યું હતું. સુરતમાં વકીલો 3 ઓક્ટોબર સુધી કામગીરીથી અળગા રહેશે.
ગાંધીનગર મનપા ચૂંટણીમાં કોંગ્રેસે ચૂંટણી ઢંઢેરો જાહેર કર્યો છે. ઢંઢેરામાં 10 હજાર રોજગારીનું વચન, ટેક્સમુક્તિ સહિત મફત સુવિધાઓની જાહેરાત કરવામાં આવી છે.
મહુવાના વિજય સરઘસમાં ભાજપ નેતાઓએ ટ્રાફિક નિયમોના ભંગ કર્યાનો આક્ષેપ થયો છે. ધારાસભ્ય હેલ્મેટ વિના બાઈક પર જોવાયા હતા, અને તેમના પુત્રએ ટ્રેક્ટરથી સ્ટંટ કર્યાનો વીડિયો વાયરલ થયો છે.
સામાજિક કાર્યકર બનીને સોની સાથે રૂ. 1.79 કરોડની છેતરપિંડીનો કિસ્સો સામે આવ્યો છે. ગરીબ દીકરીઓને દાગીના આપવાના બહાને રૂ. 2.86 કરોડની ખરીદી કરવામાં આવી હતી, પરંતુ પૈસા ચૂકવવામાં આવ્યા નથી.
સિવિલ હોસ્પિટલમાં ડાયાબિટીસ અને બ્લડ પ્રેશર સહિત 350 દવાઓની અછત સર્જાઈ છે. છેલ્લા ત્રણ મહિનાથી સપ્લાયની સમસ્યા છે, જેના કારણે દર્દીઓને બહારથી દવા ખરીદવાની ફરજ પડી છે.
ઝાંસીમાં ઓલ ઇન્ડિયા મલ્ખમ ચેમ્પિયનશિપમાં ગુજરાતના ખેલાડીઓએ ડંકો વગાડ્યો છે. અંડર-18 બોયઝ અને અંડર-14 ગર્લ્સ ટીમે ગોલ્ડ મેડલ જીત્યા છે, અને અનેક ખેલાડીઓએ મેડલ જીત્યા છે.
ગુજરાતમાંથી બે-ત્રણ દિવસમાં ચોમાસાની વિધિવત વિદાયની શક્યતા છે. ઉત્તર અને દક્ષિણ ગુજરાત તેમજ સૌરાષ્ટ્ર-કચ્છમાં બે દિવસ હળવા વરસાદની આગાહી છે.