દેશમાં કરોડો નોકરિયાતો કર્મચારી ભવિષ્ય નિધિ સંગઠન એટલે કે EPFOના સભ્યો છે. તેમને PF, પેન્શન અને વીમા સંબંધિત સાચી અને સમયસર માહિતી મળે તે માટે EPFOએ ગત વર્ષે WhatsApp ચેનલ શરૂ કરી હતી. EPFOના જણાવ્યા મુજબ, આ ચેનલ સાથે અત્યાર સુધીમાં 2 લાખ લોકો જોડાયા છે, પરંતુ મોટાભાગના સભ્યો હજુ તેનાથી અજાણ છે.
આ ચેનલ પર EPFOની ત્રણ યોજનાઓ – કર્મચારી ભવિષ્ય નિધિ (EPF), કર્મચારી પેન્શન યોજના (EPS) અને કર્મચારી જમા સાથે જોડાયેલી વીમા યોજના (EDLI) – સંબંધિત માહિતી આપવામાં આવે છે. આ ઉપરાંત નવી પહેલ, ડેડલાઇન અને નિર્ણયોની જાણકારી પણ અહીં મળે છે. સભ્યોની ફરિયાદોના નિવારણ માટે EPFO જે કેમ્પનું આયોજન કરે છે તેની માહિતી પણ આ ચેનલ પર ઉપલબ્ધ છે. આ માહિતી કર્મચારીઓ અને કંપનીઓ બંને માટે ઉપયોગી છે.
ચેનલ પર EPFO યુટ્યુબ વીડિયો જેવા ટ્યુટોરિયલની લિંક પણ શેર કરવામાં આવે છે, જેમાં PFમાંથી એડવાન્સ પૈસા ઉપાડવાની રીત, પ્રધાનમંત્રી વિકસિત ભારત રોજગાર યોજનાની માહિતી, ફરીથી નોકરી શરૂ કર્યા પછી PFમાં યોગદાન કેવી રીતે થાય છે અને EPFOની અન્ય સેવાઓ તથા જાગૃતિ સંબંધિત વીડિયોનો સમાવેશ થાય છે.
EPFOની અધિકૃત WhatsApp ચેનલ સાથે જોડાવા માટે આ લિંક પર ક્લિક કરો: https://www.whatsapp.com/channel/0029Vb6kmH48Pgs8ftd6Kw3Y
શું WhatsApp થી PFનું કામ થઈ શકે? આનો જવાબ છે 'ના'. આ ચેનલ ફક્ત માહિતી આપવા માટે છે. EPF, EPS કે EDLI સંબંધિત કોઈપણ કામ માટે તમારે EPFO પોર્ટલ અથવા ઉમંગ (UMANG) એપ પર જવું પડશે. ઓફલાઇન કામ માટે તમે તમારા વિસ્તારની EPF ઓફિસે પણ જઈ શકો છો.
દરમિયાન, EPFOએ કંપનીઓ માટે સપ્ટેમ્બર 2026નું ECR (ઇલેક્ટ્રોનિક ચલાન કમ રિટર્ન) ભરવાની છેલ્લી તારીખ 15 ઓક્ટોબરથી વધારીને 31 ઓક્ટોબર કરી દીધી છે. EPFOએ 14 ઓક્ટોબરે એક ટ્વીટમાં આ માહિતી આપી હતી. સંગઠને જણાવ્યું કે વેજ સીલિંગ (પગારની મર્યાદા)માં ફેરફારના કારણે ECR ભરવામાં વધુ સમય લાગી રહ્યો છે, તેથી ડેડલાઇન વધારવામાં આવી છે.