તમારા પીએફ ખાતામાં નામ, જન્મતારીખ અથવા જેન્ડર જેવી કોઈ વિગત ખોટી નોંધાયેલી હોય, તો તે તમારા માટે મુશ્કેલીનું કારણ બની શકે છે. ક્લેમ સેટલમેન્ટ, ફંડ ઉપાડવા કે ખાતું ટ્રાન્સફર કરવાના સમયે આવી ખોટી માહિતીના કારણે તમારા પૈસા અટવાઈ શકે છે.
આ સમસ્યાનો ઉકેલ લાવવા માટે કર્મચારી ભવિષ્ય નિધિ ફંડ સંસ્થા (EPFO)એ ઓનલાઇન જોઇન્ટ ડિક્લેરેશન સુવિધા વિશે માહિતી આપી છે. આ સુવિધાની મદદથી સભ્યો ઘરે બેઠા પોતાના રેકોર્ડમાં સુધારો કરી શકે છે.
પીએફની વિગતો ઓનલાઇન સુધારવાના 5 પગલાં:
1. EPFO પોર્ટલ પર જાઓ અને તમારા UAN નંબર તથા પાસવર્ડથી લૉગિન કરો.
2. લૉગિન કર્યા પછી પોર્ટલ પર ઉપલબ્ધ જોઇન્ટ ડિક્લેરેશન ફેસિલિટી પર ક્લિક કરો.
3. જે માહિતી બદલવી છે તે પસંદ કરો અને સાચી વિગત દાખલ કરો.
4. સાચી માહિતીના પુરાવા તરીકે આધાર, પાન કે જન્મ પ્રમાણપત્ર જેવા દસ્તાવેજો અપલોડ કરો.
5. દાખલ કરેલી બધી વિગતો અને અપલોડ કરેલા દસ્તાવેજોની ચકાસણી કર્યા પછી વિનંતી સબમિટ કરો.
ધ્યાન રાખવાની વાત એ છે કે દાખલ કરેલી માહિતી અને અપલોડ કરેલા દસ્તાવેજ વચ્ચે મેળ હોવો જરૂરી છે. જે વિગત સુધારવી છે તેના આધારે જ માન્ય ઓળખપત્ર અપલોડ કરવું પડશે.
વિનંતી સબમિટ કર્યા પછી શું થાય?
મેમ્બર પોર્ટલ પર કરેક્શન રિક્વેસ્ટ અને દસ્તાવેજો સબમિટ કર્યા પછી વિનંતી ચકાસણી માટે આગળ મોકલવામાં આવે છે. EPFOના નિયમો અને ચકાસણી પ્રક્રિયા હેઠળ વિગતોની તપાસ થાય છે અને ત્યારબાદ ડેટા અપડેટ કરવામાં આવે છે.
જોઇન્ટ ડિક્લેરેશન સુવિધા શું છે?
જોઇન્ટ ડિક્લેરેશન એ કર્મચારી અને એમ્પ્લોયર સાથે મળીને આપતું ફોર્મ છે. તેના દ્વારા પીએફ ખાતાના સભ્યની વ્યક્તિગત કે રોજગાર સંબંધિત વિગતો સત્તાવાર રેકોર્ડમાં સુધારવામાં આવે છે. પહેલાં આ કામ માટે ફોર્મ ભરીને પીએફ ઑફિસે રૂબરૂ જવું પડતું હતું, પરંતુ હવે આ કામ ઓનલાઇન મેમ્બર પોર્ટલ પરથી થઈ જાય છે.
પીએફ ક્લેમ રિજેક્ટ થવાથી કેવી રીતે બચવું?
UAN-આધાર લિંકિંગ: તમારો UAN નંબર આધાર સાથે લિંક થયેલો હોય અને બંને જગ્યાએ નામની સ્પેલિંગ એકસરખી હોય તેની ખાતરી કરો.
બેંક વિગતોની ચકાસણી: બેંક ખાતાનો નંબર અને IFSC કોડ સાચી રીતે અપડેટ રાખો, જેથી ઉપાડની રકમ સીધી તમારા ખાતામાં આવે.
પ્રોફાઇલ ફોટો અને મોબાઇલ: પોર્ટલ પર સક્રિય મોબાઇલ નંબર અને પ્રોફાઇલ ફોટો અપડેટ રાખો, જેથી OTP ચકાસણીમાં તકલીફ ન પડે.