વોશિંગ્ટન ડીસી: અમેરિકામાં નવેમ્બરમાં યોજાનારી મધ્યગાળની ચૂંટણી પહેલા ટેક કંપનીના માલિક અને વિશ્વના સૌથી ધનવાન વ્યક્તિ ઈલોન મસ્કે રિપબ્લિકન પાર્ટીને મોટું નાણાકીય સમર્થન આપ્યું છે. તેમણે જુલાઈ 2026 થી અત્યાર સુધીમાં રિપબ્લિકન પાર્ટીને 276 મિલિયન ડોલર એટલે કે લગભગ 2,600 કરોડ રૂપિયાથી વધુનું દાન આપ્યું છે. અમેરિકન ચૂંટણી ઇતિહાસમાં કોઈ વ્યક્તિએ એક મધ્યગાળની ચૂંટણીમાં આટલી મોટી રકમ એક પક્ષને આપી નથી.
મસ્કે 2025-26 દરમિયાન અત્યાર સુધીમાં રિપબ્લિકન પાર્ટીને આશરે 366 મિલિયન ડોલર એટલે કે લગભગ 3,500 કરોડ રૂપિયા આપ્યા છે. આ રકમ 2024ની ચૂંટણીમાં તેમણે આપેલા આશરે 290 મિલિયન ડોલર (લગભગ 2,800 કરોડ રૂપિયા) કરતાં ઘણી વધારે છે. જોકે, બંને ચૂંટણીઓમાં તેમણે કેટલાક દાન એવાં પણ આપ્યાં છે, જેની માહિતી જાહેર કરવામાં આવી નથી.
મસ્કની આ રકમ એટલી મોટી છે કે ડેમોક્રેટિક પાર્ટીને સમર્થન આપતા સંગઠને તે ત્રિમાસિક ગાળામાં તેના તમામ દાતાઓ પાસેથી મળીને પણ આના કરતાં ઓછાં નાણાં એકત્ર કર્યાં છે. ડેમોક્રેટિક પાર્ટી તરફથી કોઈ પણ અબજોપતિ દાતા મસ્ક જેટલો ખર્ચ કરી રહ્યો નથી.
મસ્કનું મોટાભાગનું દાન તેમણે બનાવેલા રાજકીય સંગઠન ‘અમેરિકા પીએસી’ મારફતે મળે છે, જે રિપબ્લિકન ઉમેદવારોના સમર્થનમાં પ્રચાર કરે છે. આ સંગઠનનો દાવો છે કે નવેમ્બરમાં ડેમોક્રેટિક પાર્ટી જીતી જાય તો અમેરિકા સામ્યવાદી, ‘વોક’ અને સીમાવિહીન દેશ બનવાનું જોખમ છે. સંગઠનના પ્રવક્તા એન્ડ્ર્યુ રોમિયોના જણાવ્યા અનુસાર, મસ્કના મોટા રોકાણથી રિપબ્લિકન પાર્ટીને પોતાની વાત લોકો સુધી પહોંચાડવાની તક મળી છે.
મસ્ક માત્ર નાણાં જ ખર્ચી રહ્યા નથી, તેમની ટીમના 3,000 કાર્યકર્તાઓ ઘરે-ઘરે જઈને મતદારોનો સંપર્ક કરી રહ્યા છે. તેઓ સામાન્ય રીતે ચૂંટણીમાં ઓછો ભાગ લેતા મતદારોને મતદાન માટે પ્રેરવાનો પ્રયાસ કરી રહ્યા છે. પ્રચારકો લોકોના દરવાજે પત્રિકાઓ પણ પહોંચાડી રહ્યા છે.
મસ્કના ચૂંટણી અભિયાનનો સૌથી મહત્વનો હિસ્સો ટેક્સાસની સેનેટ ચૂંટણી છે. અહીં રિપબ્લિકન ઉમેદવાર કેન પેક્સ્ટનના સમર્થનમાં આશરે 1,500 કરોડ રૂપિયાના જાહેરાત અભિયાનની શરૂઆત કરવામાં આવી છે. મસ્ક પોતે ટેક્સાસની રાજધાની ઓસ્ટિનમાં રહે છે અને ત્યાં તેમનું મોટું વ્યાવસાયિક રોકાણ છે. તેમની કંપની સ્પેસએક્સનું મુખ્ય મથક સ્ટારબેઝ, ટેક્સાસમાં આવેલું છે.
મસ્કનું સંગઠન ટ્રાન્સજેન્ડર અને સમાજવાદના મુદ્દાઓ પર વધુ ભાર આપી રહ્યું છે. મસ્કના તેમની ટ્રાન્સજેન્ડર પુત્રી સાથે મતભેદ રહ્યા છે અને તેમણે કહ્યું હતું કે આ મતભેદોની અસર રાજકારણમાં તેમની વધતી રુચિ પર પણ પડી છે. હવે તેમનું સંગઠન આ જ મુદ્દે ડેમોક્રેટિક ઉમેદવારોને નિશાન બનાવી રહ્યું છે.
મસ્કે 2024ની ચૂંટણી દરમિયાન મતદાર નોંધણી કરાવનારાઓને 10 લાખ ડોલરનું ઇનામ આપવાની યોજના ચલાવી હતી. મે 2025માં તેમણે કહ્યું હતું કે ભવિષ્યમાં રાજકીય ખર્ચમાં નોંધપાત્ર ઘટાડો કરશે, પરંતુ હાલના આંકડા દર્શાવે છે કે તેમની રાજકીય ભાગીદારી ચાલુ છે.
ઉલ્લેખનીય છે કે ગયા વર્ષે ટ્રમ્પ સાથે વિવાદ બાદ મસ્કે પોતાના રાજકીય કામકાજ અંગે જાહેરમાં ઓછાં નિવેદનો આપ્યાં હતાં. જોકે, છેલ્લા બે અઠવાડિયામાં બંને ત્રણ કાર્યક્રમોમાં સાથે જોવા મળ્યા અને એકબીજાની પ્રશંસા પણ કરી. 8 ઓક્ટોબર 2026ના રોજ ટ્રમ્પે મસ્કને ‘નેશનલ મેડલ ઑફ ટેક્નોલોજી એન્ડ ઇનોવેશન’થી સન્માનિત કર્યા હતા, જે બંને વચ્ચેના સંબંધો સુધરી રહ્યાનો સંકેત મનાય છે.