નવી દિલ્હી: સ્પેશિયલ ઈન્ટેન્સિવ રિવિઝન (SIR) પ્રક્રિયા અને મુખ્ય ચૂંટણી કમિશનર જ્ઞાનેશ કુમારના કાર્યકાળ સામે ઉઠેલા પ્રશ્નો વચ્ચે ચૂંટણી પંચે સુપ્રીમ કોર્ટમાં સોગંદનામું દાખલ કર્યું છે. પંચે સ્પષ્ટ કર્યું છે કે SIR સંબંધિત ત્રણેય આદેશો સર્વસંમતિથી જારી કરવામાં આવ્યા હતા અને જ્ઞાનેશ કુમારે એકલા હાથે કોઈ નિર્ણય લીધો નથી.
ચૂંટણી પંચના જણાવ્યા મુજબ, જૂન 2025, ઓક્ટોબર 2025 અને મે 2026માં SIR અંગે જારી કરાયેલા ત્રણેય આદેશો પંચની સર્વસંમતિથી લેવાયા હતા. આ સોગંદનામાને મુખ્ય ચૂંટણી કમિશનર અને બંને ચૂંટણી આયુક્તોએ મંજૂરી આપી છે. પંચે વધુમાં સ્પષ્ટ કર્યું કે ફાઈલ પર ચર્ચા દરમિયાન કોઈ કમિશનરની ટિપ્પણી કે સૂચનને પંચનો અંતિમ નિર્ણય ગણી શકાય નહીં.
મતદાર યાદીમાં નામ જોડવા માટે વપરાતા ફોર્મ 6 અંગે પંચે જણાવ્યું કે તેમાં કોઈ સંશોધન કે ફેરફાર કરવામાં આવ્યો નથી. ફોર્મમાં ફેરફાર કરવાનો અધિકાર કેન્દ્ર સરકાર પાસે છે. ઓનલાઈન અરજીમાં ફોર્મ અલગ દેખાતું હોવાના ભ્રમ અંગે પંચે કહ્યું કે હવે કાગળના ફોર્મની જેમ ઓનલાઈન પણ ફોર્મ 6 અને ઘોષણાપત્ર અલગ-અલગ દેખાડવાની વ્યવસ્થા કરવામાં આવી છે.
પંચે એમ પણ જણાવ્યું કે જે મતદાતાઓનો જૂનો રેકોર્ડ વર્તમાન યાદી સાથે મેળ ખાતો નથી, તેમને સામાન્ય રીતે ઓફિસ બોલાવવાની જરૂર પડશે નહીં. બૂથ લેવલ ઓફિસર (BLO) જાતે તેમના ઘરે જઈને દસ્તાવેજો એકત્ર કરશે. આ ઉપરાંત ECINet સિસ્ટમની તપાસ માટે IIT અને IIScના વિશેષજ્ઞોની સમિતિ પણ રચવામાં આવી છે.
મુખ્ય ચૂંટણી કમિશનરને પદ પરથી હટાવવાની માંગ કરતી અરજી અંગે પંચે કહ્યું કે આવી માંગ સ્વીકાર્ય નથી, કારણ કે CECને હટાવવાની પ્રક્રિયા સુપ્રીમ કોર્ટના જજને હટાવવા જેટલી જટિલ છે. પંચે આ મામલે વિગતવાર જવાબ આપવા માટે સમય પણ માંગ્યો છે.