એન્ફોર્સમેન્ટ ડિરેક્ટોરેટ (ED)એ શુક્રવાર, 16 ઑક્ટોબરે મુંબઈ, નાશિક, અમદાવાદ, ગાંધીનગર, સુરત અને ભાવનગરમાં 29 સ્થળોએ દરોડા પાડ્યા હતા. આ કાર્યવાહી RM ડ્રિપ એન્ડ સ્પ્રિંકલર્સ સિસ્ટમ્સ લિમિટેડ અને R&B ડેનિમ્સ લિમિટેડ નામની બે લિસ્ટેડ કંપનીઓના શેરોમાં હેરફેરના આરોપમાં કરવામાં આવી છે.
EDની તપાસમાં સામે આવ્યું છે કે નકલી વોટ્સએપ ગ્રુપ્સ દ્વારા આપવામાં આવેલી ટિપ્સની જાળમાં ફસાઈને 1 લાખથી વધુ રિટેલ રોકાણકારોએ નાણાં ગુમાવ્યાં છે. દરોડાના દાયરામાં બંને કંપનીઓની કોર્પોરેટ કચેરીઓ, પ્રમોટરોના નિવાસસ્થાનો, ઓછી કિંમતે શેર મેળવનાર વ્યક્તિઓના ઘરો, સ્ટોક-બ્રોકિંગ અને ફાઇનાન્સ કંપનીઓની કચેરીઓનો સમાવેશ થાય છે. આ ઉપરાંત પ્રમોટર વોટ્સએપ ગ્રુપ ચલાવતા હોવાની શંકા ધરાવતા લોકોના સ્થળોની પણ તલાશી લેવામાં આવી હતી. કાર્યવાહીમાં અનેક શંકાસ્પદ દસ્તાવેજો, ડિજિટલ ઉપકરણો, શેર વ્યવહારોના રેકોર્ડ અને મિલકત સંબંધિત કાગળો જપ્ત કરવામાં આવ્યા છે.
PMLA હેઠળ હાથ ધરાયેલી તપાસમાં ખુલાસો થયો કે એપ્રિલ 2023થી માર્ચ 2024 વચ્ચે બંને કંપનીઓએ પસંદગીના વ્યક્તિઓ અને સંસ્થાઓને 3.5 કરોડથી વધુ શેર અને કન્વર્ટિબલ વોરન્ટ્સ જારી કર્યા હતા. આ શેરો માટે ચૂકવાયેલી રકમનો મોટો હિસ્સો સંબંધિત વ્યક્તિઓ, કંપનીઓ અને ધિરાણદાતાઓના એક નાના સર્કલમાંથી આવ્યો હતો. ત્યારબાદના મહિનાઓમાં શેરોના ભાવ સતત વધારવામાં આવ્યા, જ્યારે મોટાભાગના શેર એ જ લોકો પાસે રહ્યા.
તપાસમાં આગળ જાણવા મળ્યું કે ડિસેમ્બર 2025ના અંતથી ફેબ્રુઆરી 2026 વચ્ચે મલ્ટીબેગર સ્ટોક્સ જેવા નામોથી વોટ્સએપ કમ્યુનિટીઝ બનાવવામાં આવી હતી. આ ગ્રુપ્સ દ્વારા સીધાસાદા રિટેલ રોકાણકારોને દરરોજ આ શેરો ખરીદવાની ટિપ્સ મોકલવામાં આવતી હતી. આ ગ્રુપ્સ હરિયાણા અને મુંબઈના અન્ય લોકોના નામે જારી કરાયેલા સિમ કાર્ડ્સનો ઉપયોગ કરીને ચલાવવામાં આવતા હતા, પરંતુ તેનું સંચાલન ગુજરાતના ભાવનગરથી કરવામાં આવતું હતું.
ફર્જી ટિપ્સના લાલચમાં આવીને આ બંને કંપનીઓના શેર ખરીદનારા રોકાણકારોની સંખ્યા ઝડપથી વધી. શરૂઆતમાં ખરીદદારોની સંખ્યા આશરે 3,400 હતી, જે અચાનક વધીને 1 લાખને પાર પહોંચી ગઈ.
EDના સૂત્રોના જણાવ્યા અનુસાર, 25 ફેબ્રુઆરી 2026ના રોજ તમામ વોટ્સએપ ગ્રુપ્સ અચાનક ડિલીટ કરી દેવામાં આવ્યા. તેના તરત બાદ બંને કંપનીઓના શેર લોઅર સર્કિટમાં આવી ગયા અને માત્ર થોડા જ દિવસોમાં તેમની કિંમતમાં લગભગ 70%નો ઘટાડો થયો. આના કારણે 1 લાખથી વધુ નાના રોકાણકારોને નુકસાન થયું અને તેઓ એવા શેરો સાથે ફસાઈ ગયા જેને વેચી પણ શકાય તેમ નહોતું.