કેન્દ્ર સરકાર ડ્રાઈવિંગ લાઇસન્સના નિયમોમાં મોટા ફેરફાર કરવાની તૈયારીમાં છે. માર્ગ પરિવહન અને રાજમાર્ગ મંત્રાલયે સેન્ટ્રલ મોટર વ્હીકલ રૂલ્સમાં સંશોધન માટે ડ્રાફ્ટ રજૂ કર્યો છે. આ ડ્રાફ્ટ અનુસાર ભારતીય અને વિદેશી નાગરિકો માટે અલગ-અલગ રંગના ડ્રાઈવિંગ લાઇસન્સનો પ્રસ્તાવ છે. હાલમાં આ માત્ર પ્રસ્તાવ છે અને અંતિમ નિયમ લાગુ કરતાં પહેલાં સરકાર લોકો પાસેથી સૂચનો અને વાંધા મંગાવી રહી છે.
પ્રસ્તાવ મુજબ ભારતીય નાગરિકોના લાઇસન્સ કેસરી અને વિદેશી નાગરિકોના લાઇસન્સ વાદળી રંગના હોઈ શકે છે. આનાથી ટ્રાફિક કે સુરક્ષા અધિકારીઓને નાગરિકતા ઓળખવી સરળ બનશે.
નવા પ્રસ્તાવ હેઠળ લાઇસન્સ પર રાષ્ટ્રીયતા, બ્લડ ગ્રુપ, મોબાઈલ નંબર અને ઇમરજન્સી કોન્ટેક્ટ નંબર જેવી વધુ માહિતી ઉમેરાશે. અકસ્માત કે આપાતકાલીન સ્થિતિમાં આ માહિતી ઉપયોગી સાબિત થઈ શકે છે. ઉંમર, સરનામું અને ઓળખ સાબિત કરવા માટેના જરૂરી દસ્તાવેજોની યાદીમાં પણ ફેરફાર થઈ શકે છે.
ડ્રાઈવિંગ ટેસ્ટ પાસ કરવાનો પણ વધુ અઘરો બનાવવાનો પ્રસ્તાવ છે. હાલમાં પાસ થવા માટે 60 ટકા ગુણ જરૂરી છે, જે વધારીને 75 ટકા કરવાનો પ્રસ્તાવ છે. આનાથી લાઇસન્સ મેળવનાર વ્યક્તિને માર્ગ સુરક્ષા અને વાહનવ્યવહારના નિયમોનું કેટલું જ્ઞાન છે તેનું મૂલ્યાંકન સારી રીતે થઈ શકશે.
ઓનલાઈન સેવાઓને વધુ સરળ અને ઝડપી બનાવવાની યોજના પણ છે. આધાર ઓથેન્ટિકેશનથી ઓનલાઈન સેવા મેળવનારને ફીમાં વિશેષ છૂટ મળી શકે છે. લાઇસન્સમાં નામ કે સરનામું બદલવા જેવી અરજીઓનો નિકાલ 15 દિવસમાં કરવાનો પ્રસ્તાવ છે, જેથી લોકોને આરટીઓના બિનજરૂરી ચક્કર લગાવવા ન પડે.