અજય દેવગન અભિનીત ફિલ્મ 'દૃશ્યમ 3: ધ કન્ક્લૂઝન'એ ભારતીય બોક્સ ઓફિસ પર જોરદાર શરૂઆત કરી છે. ફિલ્મે પહેલા દિવસે ભારતમાં ₹66.75 કરોડની નેટ કમાણી કરી છે. આ અજય દેવગનની અભિનય કારકિર્દીની સૌથી મોટી ઓપનિંગ છે.
અભિષેક પાઠકના નિર્દેશનમાં બનેલી આ ફિલ્મ શુક્રવાર, 2 ઓક્ટોબર 2026ના રોજ સિનેમાઘરોમાં રિલીઝ થઈ છે. ફિલ્મમાં અજય દેવગન વિજય સાલગાંવકરના પાત્રમાં પરત ફર્યો છે.
ઉદ્યોગના આંકડાઓ અનુસાર, ફિલ્મે ભારતમાં 15,759 શોમાંથી ₹66.75 કરોડની નેટ કમાણી કરી છે, જ્યારે તેનું ગ્રોસ કલેક્શન ₹80.10 કરોડથી વધુ રહ્યું છે. વિદેશોમાં ફિલ્મે ₹15 કરોડ કમાયા છે. આ સાથે તેની કુલ વર્લ્ડવાઇડ ગ્રોસ કમાણી ₹95.10 કરોડ થઈ છે.
આ સાથે 'દૃશ્યમ 3' વર્ષ 2026ની બીજી સૌથી મોટી ઓપનિંગ ધરાવતી હિન્દી ફિલ્મ બની છે. આ યાદીમાં તે માત્ર 'ધુરંધરઃ ધ રિવેન્જ' પાછળ છે. બોલિવૂડના ઇતિહાસમાં પણ આ ફિલ્મ ત્રીજા ક્રમની સૌથી મોટી ઓપનિંગ કરનારી ફિલ્મ બની છે. તેનાથી આગળ ફક્ત રણવીર સિંહની 'ધુરંધરઃ ધ રિવેન્જ' અને શાહરુખ ખાનની 'જવાન' છે.
ફિલ્મે રણવીર સિંહની 'ધુરંધર'ની ₹30 કરોડની ઓપનિંગને પાછળ છોડી દીધી છે. તેણે શાહરુખ ખાનની 'પઠાન'ની ₹57 કરોડ અને રણબીર કપૂરની 'એનિમલ'ની ₹63 કરોડની ઓપનિંગને પણ પાર કરી લીધી છે. વર્લ્ડવાઇડ કલેક્શનમાં ફિલ્મે 'કલ્કિ'ની ₹95 કરોડ અને 'સાલાર'ની ₹91 કરોડની કમાણીથી પણ આગળ નીકળી ગઈ છે.
ફિલ્મ રિલીઝ પહેલાં જ એડવાન્સ બુકિંગમાં જબરદસ્ત માંગ જોવા મળી હતી. બુકિંગ શરૂ થયાના સાત દિવસમાં ફિલ્મે ભારતમાં ₹60.17 કરોડની ગ્રોસ કમાણી કરી હતી, જેમાં બ્લોક કરવામાં આવેલી સીટ્સની કમાણી પણ સામેલ હતી. બ્લોક સીટ્સને હટાવ્યા બાદ એડવાન્સ ગ્રોસ કલેક્શન ₹49.29 કરોડ રહ્યું. ફિલ્મે 51,570 શોમાં આશરે 18.02 લાખ ટિકિટ વેચી હતી.
અજય દેવગનની કારકિર્દીની સૌથી મોટી ઓપનિંગ કરનારી ફિલ્મોમાં 'દૃશ્યમ 3'એ નવો રેકોર્ડ બનાવ્યો છે. આ પહેલાં આ રેકોર્ડ 'સિંઘમ અગેઇન'ના નામે હતો, જેણે પહેલા દિવસે ₹43.50 કરોડની કમાણી કરી હતી.
શુક્રવારે ઓપનિંગ ડે પર થયેલી કમાણી બાદ વીકએન્ડમાં ફિલ્મની કમાણીમાં ઉછાળો આવવાની શક્યતા છે. આ ફિલ્મ અજય દેવગનની ઘણી સૌથી વધુ કમાણી કરનારી ફિલ્મોના રેકોર્ડ પણ તોડી શકે છે. હાલમાં તેમની સૌથી વધુ કમાણી કરનારી ફિલ્મ 'તાનાજીઃ ધ અનસંગ વોરિયર' છે, જેણે કુલ ₹361 કરોડની કમાણી કરી હતી.
'દૃશ્યમ 3: ધ કન્ક્લૂઝન'માં અજય દેવગન સાથે તબ્બુ, શ્રિયા સરન, ઇશિતા દત્તા, મૃણાલ જાધવ અને રજત કપૂર તેમની જૂની ભૂમિકાઓમાં પરત ફર્યા છે. આ ભાગમાં જયદીપ અહલાવત અને પ્રકાશ રાજની પણ એન્ટ્રી થઈ છે. આ ફ્રેન્ચાઇઝી તેની સસ્પેન્સ થ્રિલર વાર્તા માટે જાણીતી છે, જેના અગાઉના બંને ભાગ બોક્સ ઓફિસ પર સફળ રહ્યા હતા.
ઉલ્લેખનીય છે કે, અક્ષય ખન્નાએ છેલ્લી ઘડીએ શૂટિંગ છોડ્યું હોવાને કારણે આ ફિલ્મ ચર્ચામાં રહી હતી. 'દૃશ્યમ 3'ના લેખક અને નિર્દેશક અભિષેક પાઠકે જણાવ્યું હતું કે, અજય દેવગન સાથે અક્ષય ખન્નાના દૃશ્યોનું શૂટિંગ શરૂ થવાના એક અઠવાડિયા પહેલાં જ તેમણે પ્રોજેક્ટ છોડી દીધો હતો. આમ છતાં નિર્માતાઓએ શૂટિંગ મુલતવી રાખવાને બદલે ત્રણ દિવસમાં સ્ક્રિપ્ટ ફરીથી લખી. અક્ષય ખન્નાની ભૂમિકાને નવા પાત્રમાં બદલીને જયદીપ અહલાવતને કાસ્ટ કરવામાં આવ્યો.