રિટેલ ચેઇન ડીમાર્ટ ચલાવતી કંપની એવન્યુ સુપરમાર્ટ્સ લિમિટેડને નાણાકીય વર્ષ 2026-27ના બીજા ત્રિમાસિક ગાળામાં 743 કરોડ રૂપિયાનો ચોખ્ખો નફો થયો છે. વાર્ષિક ધોરણે તેમાં 8.5%નો વધારો થયો છે. ગયા વર્ષની આ જ ત્રિમાસિકમાં કંપનીને 685 કરોડ રૂપિયાનો નફો થયો હતો.
જુલાઈ-સપ્ટેમ્બર ત્રિમાસિક ગાળામાં ડીમાર્ટે 19,644.01 કરોડ રૂપિયાની આવક નોંધાવી. એટલે કે વાર્ષિક ધોરણે કંપનીની આવકમાં 18%નો વધારો થયો છે. જોકે, કંપનીનો ખર્ચ પણ 18% વધ્યો છે. ગયા વર્ષની સમાન ત્રિમાસિકમાં કંપનીની આવક 16,676.30 કરોડ રૂપિયા રહી હતી.
કંપનીએ નાણાકીય વર્ષ 2026-27માં અત્યાર સુધીમાં 18 નવા સ્ટોર ખોલ્યા છે. આ સાથે દેશમાં કંપનીના કુલ સ્ટોરની સંખ્યા હવે 518 થઈ ગઈ છે.
ડીમાર્ટના પરિણામોની મુખ્ય વાતો:
મજબૂત આવક વૃદ્ધિ: ડીમાર્ટનું વેચાણ હજુ પણ મજબૂત છે. 18%ની આવક વૃદ્ધિ દર્શાવે છે કે ગ્રાહકોની માગ અને સ્ટોર્સ પરની અવરજવરમાં ઘટાડો થયો નથી.
નફાની ધીમી ગતિ: આવકમાં 18%નો વધારો થયો, પરંતુ ચોખ્ખો નફો માત્ર 8.5% વધ્યો. તેનો અર્થ એ છે કે કમાણી થઈ રહી છે, પરંતુ ખર્ચ વધવાથી નફો ધીમો પડ્યો છે.
પગાર/વેતન મોંઘવારીની અસર: કંપનીના CEO અંશુલ અસાવાએ સ્વીકાર્યું છે કે એન્ટ્રી-લેવલ કર્મચારીઓના પગારમાં વધારો થવાથી ઓપરેટિંગ ખર્ચ વધ્યો છે. મોંઘવારીની અસર માત્ર ગ્રાહકો પર જ નહીં, પરંતુ કંપનીના માનવબળના ખર્ચ પર પણ પડી રહી છે.
જૂના સ્ટોર્સનું મજબૂત પ્રદર્શન: જૂના સ્ટોર્સની વૃદ્ધિ 6.8%થી વધીને 9.5% થઈ છે, જે કંપની માટે સકારાત્મક સંકેત છે. તેનો અર્થ એ છે કે માત્ર નવા સ્ટોર ખોલવાથી જ કમાણી વધી રહી નથી, પરંતુ જૂના સ્ટોર્સમાં પણ ગ્રાહકો વધુ ખરીદી કરી રહ્યા છે.
ઓછા ભાવની વ્યૂહરચના: મોંઘવારી છતાં ડીમાર્ટ પોતાના ઓછા ભાવના મોડલથી પાછું હટ્યું નથી. કંપની થોડું નુકસાન સહન કરીને પણ ગ્રાહકોને સસ્તો માલ આપી રહી છે, જેથી ગ્રાહક આધાર જળવાઈ રહે.
એક વર્ષમાં ડીમાર્ટનો શેર લગભગ 20% ઘટ્યો: પરિણામો જાહેર કરતા પહેલાં શુક્રવાર, 9 ઓક્ટોબરે એવન્યુ સુપરમાર્ટ (ડીમાર્ટ)નો શેર 1.79% ઘટીને 3,521 રૂપિયાના સ્તરે બંધ થયો હતો. કંપનીનો શેર એક મહિનામાં 5% અને એક વર્ષમાં આશરે 20% ઘટ્યો છે.
સ્ટેન્ડઅલોન અને કન્સોલિડેટેડ શું હોય છે? કંપનીઓના પરિણામો બે ભાગમાં આવે છે- સ્ટેન્ડઅલોન અને કન્સોલિડેટેડ. સ્ટેન્ડઅલોનમાં માત્ર એક સેગમેન્ટ અથવા યુનિટનું નાણાકીય પ્રદર્શન દર્શાવવામાં આવે છે. જ્યારે કન્સોલિડેટેડ અથવા એકીકૃત નાણાકીય અહેવાલમાં સમગ્ર કંપનીનો અહેવાલ આપવામાં આવે છે.
સુપરમાર્કેટ ચેઇન ડીમાર્ટના સ્થાપક દમાણી છે: સુપરમાર્કેટ ચેઇન ડીમાર્ટના સ્થાપક રાધાકિશન દમાણી છે. તેમણે ડીમાર્ટની શરૂઆત 2002માં મુંબઈના પવઈ વિસ્તારમાંથી કરી હતી. અહીં તેમણે ડીમાર્ટનો પહેલો સ્ટોર ખોલ્યો હતો. 1999માં દમાણીએ નવી મુંબઈના નેરુલમાં 'અપના બજાર'ની એક ફ્રેન્ચાઇઝી શરૂ કરી હતી, પરંતુ તેમને આ મોડેલ પસંદ આવ્યું નહોતું.
ડીમાર્ટે 2017માં શેરબજારમાં ડેબ્યૂ કર્યું હતું: ડીમાર્ટ સુપરમાર્કેટ ચેઇનનું સંચાલન એવન્યુ સુપરમાર્ટ્સ લિમિટેડ (ASL) કરે છે. એવન્યુ સુપરમાર્ટ્સના CEO નેવિલ નોરોન્હા છે. 71 વર્ષીય રાધાકિશન દમાણીની કંપની ડીમાર્ટે 2017માં શેરબજારમાં પ્રવેશ કર્યો હતો. ડીમાર્ટ 21 માર્ચ 2017ના રોજ શેરબજારમાં લિસ્ટ થઈ હતી. તે દિવસે કંપનીનું માર્કેટ કેપ 39,988 કરોડ રૂપિયા હતું. હવે કંપનીનું માર્કેટ કેપ 2.29 લાખ કરોડ રૂપિયા છે.