દિવાળીના તહેવારોમાં નવું વાહન ખરીદવું એ ઘણા માટે ખાસ હોય છે. આ સમયે ઓટો કંપનીઓ અને ડીલર્સ ગ્રાહકોને લાલચ આપવા માટે કેશ ડિસ્કાઉન્ટ, એક્સચેન્જ બોનસ અને અન્ય ઓફર્સ જાહેર કરે છે. પણ ફક્ત જાહેરાત જોઈને ઉતાવળમાં ખરીદી કરવાથી નુકસાન થઈ શકે છે. વાહનની કિંમત ઉપરાંત ઇન્શ્યોરન્સ, લોન, એસેસરીઝ અને ડિલિવરી પહેલાંની ચકાસણી પર ધ્યાન આપવાથી તમે હજારો રૂપિયા બચાવી શકો છો. જાણો એવી 6 રીતો:
1. એક નહીં, અનેક ડીલરશોરૂમમાંથી કોટેશન લો: ખરીદી પહેલાં તમારા શહેરના ઓછામાં ઓછા 3 શોરૂમમાંથી તે જ મોડેલ અને વેરિઅન્ટની ઓન-રોડ કિંમતનું કોટેશન મેળવો. તેનાથી ખબર પડશે કે કયો ડીલર કેટલું ડિસ્કાઉન્ટ આપે છે. તહેવારોમાં વેચાણનું દબાણ હોય છે, તેથી બીજા શોરૂમની ઓફર બતાવીને ભાવ ઘટાડી શકાય છે.
2. ઇન્શ્યોરન્સના વિકલ્પો ચકાસો: ડીલર તરફથી મળતું ઇન્શ્યોરન્સ ખર્ચ વધારી શકે છે. પૉલિસીબજાર કે અન્ય ઓનલાઇન પ્લેટફોર્મ પર ભાવની સરખામણી કરો. IDV અને ઝીરો ડેપ, એન્જિન પ્રોટેક્શન જેવા કવર સમાન રાખીને સરખામણી કરો. બહારથી પોલિસી લેવાથી 15,000થી 40,000 રૂપિયા સુધીની બચત થઈ શકે છે. ઓનલાઇન કોટેશન બતાવીને ડીલરને પણ એ જ ભાવે ઇન્શ્યોરન્સ આપવા કહી શકાય.
3. કાર લોનના વ્યાજદર પર વાટાઘાટ કરો: લોન લેતી વખતે ફક્ત ડીલરની ભાગીદાર બેંક પર નિર્ભર ન રહો. તમારી બેંક અને અન્ય બેંકોના વ્યાજદર, પ્રોસેસિંગ ફી અને ઓફર્સની સરખામણી કરો. દિવાળીમાં કેટલીક બેંકો ઓછી કે શૂન્ય પ્રોસેસિંગ ફી આપે છે. પ્રી-એપ્રૂવ્ડ લોન લેવી ફાયદાકારક રહે છે. CIBIL સ્કોર 750થી વધુ હોય તો વ્યાજદરમાં છૂટ માટે વાત કરો.
4. બિનજરૂરી એસેસરીઝ ટાળો: ડીલર્સ ઘણી વાર કોટેશનમાં 20,000થી 35,000 રૂપિયાની 'એસેન્શિયલ કિટ' ઉમેરે છે, જેમાં મેટ, મડ ફ્લેપ, પરફ્યુમ જેવી સામાન્ય વસ્તુઓ હોય છે. તેની જરૂરિયાત વિચારો અને બિનજરૂરી વસ્તુઓ બિલમાંથી કાઢી નાખવા કહો. મેટ, સીટ કવર જેવી એસેસરીઝ બહારથી સસ્તા ભાવે મળે છે, પણ વૉરંટીની શરતો ચકાસી લો.
5. NCB અને કોર્પોરેટ ડિસ્કાઉન્ટનો લાભ લો: જૂનું વાહન વેચો છો તો નો-ક્લેમ બોનસ (NCB) નવી પોલિસીમાં ટ્રાન્સફર કરાવો. તેનાથી ઓન-ડેમેજ પ્રીમિયમમાં 20%થી 50% સુધીની છૂટ મળી શકે છે. કોર્પોરેટ કંપની, સરકારી વિભાગ, સૈન્ય કે શૈક્ષણિક સંસ્થા સાથે જોડાયેલા હોવ તો કોર્પોરેટ ડિસ્કાઉન્ટ પૂછો. તેનાથી 5,000થી 20,000 રૂપિયા સુધીની વધારાની બચત થઈ શકે છે.
6. ડિલિવરી પહેલાં PDI ચોક્કસ કરો: તહેવારોમાં માંગ વધવાથી ડીલરશિપ પર દબાણ હોય છે. તેથી પૂરું પેમેન્ટ કરતાં પહેલાં અને રજીસ્ટ્રેશન પહેલાં પ્રી-ડિલિવરી ઇન્સ્પેક્શન (PDI) અવશ્ય કરો. દિવસના અજવાળામાં બોડી, કલર, ડેન્ટ અને સ્ક્રેચ ધ્યાનથી તપાસો. VIN નંબર પરથી ઉત્પાદનનો મહિનો-વર્ષ ચકાસો. કોઈ ખામી હોય તો પૂરું પેમેન્ટ કે ડિલિવરી પહેલાં ડીલર સાથે વાત કરો.