અમદાવાદ જિલ્લાના ધોળકામાં આવેલી સંતોકબા હોસ્પિટલના પરિસરમાં 10 જેટલાં ઘટાદાર વૃક્ષો કાપવામાં આવતાં સેંકડો પક્ષીઓ અને તેમનાં બચ્ચાં નીચે પટકાયાં અને અનેક પક્ષીઓનાં મોત થયાં છે. આ ઘટના ચોમાસાની પ્રજનન ઋતુમાં બની છે.
હોસ્પિટલ ધોળકા નગરપાલિકા દ્વારા સંચાલિત છે. વર્ષોથી આ વૃક્ષો પર પક્ષીઓ માળા બાંધીને રહેતાં હતાં. ચોમાસામાં પક્ષીઓ પ્રજનન કરે છે અને બચ્ચાં ઉછેરે છે. આ સમયે વૃક્ષો કાપતાં માળા અને બચ્ચાં જમીન પર પટકાયાં. ઘણાં પક્ષીઓએ ઘટનાસ્થળે જ જીવ ગુમાવ્યો.
આ બનાવ સામે સ્થાનિક રહીશો અને પર્યાવરણપ્રેમીઓમાં ભારે રોષ છે. લોકોએ પ્રશ્ન ઉઠાવ્યો છે કે ચોમાસામાં જ વૃક્ષો કાપવાની ઉતાવળ શા માટે કરવામાં આવી. તેમણે દોષિતો સામે કાર્યવાહી અને ભવિષ્યમાં આવી ઘટના ન થાય તે માટે પગલાં લેવાની માગ કરી છે.
આ મામલે હોસ્પિટલ પ્રશાસન કે નગરપાલિકા તરફથી તાત્કાલિક કોઈ સત્તાવાર પ્રતિક્રિયા મળી નથી.