ધનતેરસના તહેવાર નજીક આવતાં ઘરોમાં સફાઈ અને સજાવટની તૈયારીઓ શરૂ થઈ જાય છે. નવા વાસણોની ખરીદીથી લઈને મંદિરની સજાવટ સુધી દરેક વસ્તુનું ધ્યાન રાખવામાં આવે છે. માન્યતા છે કે યોગ્ય સ્થળે દીવો પ્રગટાવવાથી ઘરમાં સુખ-સમૃદ્ધિ આવે છે અને નકારાત્મકતા દૂર થાય છે. વાસ્તુશાસ્ત્રમાં દરેક ખૂણામાં દીવા પ્રગટાવવાનું અલગ મહત્વ છે. ચાલો જાણીએ કયા સ્થાને દીવો મૂકવો શુભ મનાય છે.
વાસ્તુ માન્યતા અનુસાર મુખ્ય દરવાજા પર દીવો પ્રગટાવવો શુભ છે, કારણ કે મુખ્ય દ્વારથી જ ઘરમાં સકારાત્મક ઊર્જા અને ખુશીઓ પ્રવેશે છે. સાંજના સમયે દરવાજાની બંને બાજુ દીવા રાખી શકાય.
ધનતેરસના દિવસે ભગવાન ધન્વંતરિ, માતા લક્ષ્મી અને ભગવાન કુબેરની પૂજા કરવામાં આવે છે. વાસ્તુશાસ્ત્રમાં ઘરનો ઉત્તર-પૂર્વ (ઈશાન) ખૂણો પૂજા-પાઠ માટે શુભ મનાય છે. એટલે આ દિશામાં બનેલા મંદિરમાં દીવો પ્રગટાવવો સારો ગણાય.
હિન્દુ ધર્મમાં તુલસીના છોડને પૂજનીય માનવામાં આવે છે. ધનતેરસની સાંજે તુલસી પાસે પણ દીવો પ્રગટાવવાની પરંપરા છે. માન્યતા છે કે તેનાથી ઘરમાં સુખ-શાંતિ અને સમૃદ્ધિ રહે છે. જો ઘરમાં તુલસીનો છોડ હોય તો સૂર્યાસ્ત પછી તેની પાસે દીવો રાખી શકાય.
ધનતેરસ પર યમ દીપદાનનું પણ વિશેષ મહત્વ છે. માન્યતા અનુસાર આ દિવસે સાંજે ઘરની બહાર દક્ષિણ દિશા તરફ મુખ રાખીને દીવો પ્રગટાવવામાં આવે છે. આ દીવાને 'યમ દીપદાન' અથવા યમરાજના નામનો દીવો કહેવાય છે. ધાર્મિક માન્યતા અનુસાર આમ કરવાથી પરિવારના સભ્યો પરથી અકાળ મૃત્યુ કે અચાનક થતા અકસ્માતનો ભય દૂર થાય છે અને રક્ષણ મળે છે.
ડિસ્ક્લેમર: આ લેખમાં આપેલી માહિતી ધાર્મિક માન્યતાઓ, વાસ્તુશાસ્ત્રના નિયમો અને લોકવાયકાઓ પર આધારિત છે. આ માહિતી માત્ર સામાન્ય જાગૃતિ માટે છે. કોઈપણ ઉપાય કે નિયમ અપનાવતા પહેલા સંબંધિત નિષ્ણાત અથવા ધર્મગુરુની સલાહ લેવી.