સોનાના ભાવમાં ઘટાડો થતાં ધનતેરસ અને દિવાળી પર દેશમાં સોનાની ખરીદીમાં ગયા વર્ષની સરખામણીએ 30%નો વધારો નોંધાયો છે. આ સમયગાળામાં દેશમાં આશરે 52 ટન સોનું ખરીદવામાં આવ્યું, જેની કિંમત 72 હજાર કરોડ રૂપિયા રહી છે.
સોનાની કિંમત રેકોર્ડ 1.80 લાખ રૂપિયાથી ઘટીને 1.42 લાખ રૂપિયા પ્રતિ 10 ગ્રામ પર આવી છે, એટલે કે તેમાં 38 હજાર રૂપિયા (21%)નો ઘટાડો થયો છે.
ચાંદીની ખરીદી પણ 10% વધીને 300 ટન પર પહોંચી છે. તેની કિંમત આશરે 5,400 કરોડ રૂપિયા રહી છે.
આ નાણાકીય વર્ષમાં સપ્ટેમ્બર સુધી સોનાના વેચાણનું પ્રમાણ ગયા વર્ષની સરખામણીએ લગભગ 50% ઘટી ગયું હતું. તેનું કારણ સોનાના ઊંચા ભાવ, આયાત ડ્યૂટીમાં વધારો અને વડાપ્રધાન નરેન્દ્ર મોદીએ લોકોને સોનું ન ખરીદવાની કરેલી અપીલ હોવાનું જણાવાયું હતું.
ઇન્ડિયા બુલિયન એન્ડ જ્વેલર્સ એસોસિયેશન (IBJA)ના રાષ્ટ્રીય સચિવ સુરેન્દ્ર મહેતાના જણાવ્યા મુજબ, ભાવ વધવાને કારણે ઘણા ગ્રાહકોએ સોનું ખરીદવાનું ટાળી દીધું હતું. હવે ભાવમાં ઘટાડો થયા બાદ તેઓ ફરી બજારમાં પરત ફર્યા છે. તેમણે જણાવ્યું કે સોનાની ખરીદી હજુ પણ ચાલુ છે. IBJA મુજબ, લગ્નની સિઝનની શરૂઆતથી પણ ખરીદી વધવામાં મહત્વની ભૂમિકા ભજવાઈ છે.
બેંગલુરુની જ્વેલરી બ્રાન્ડ સી કૃષ્ણૈયા ચેટ્ટી જ્વેલર્સના જણાવ્યા અનુસાર, ગયા વર્ષની સરખામણીએ આ વખતે ધનતેરસ પર કુદરતી હીરાનું વેચાણ 250% વધુ રહ્યું છે. એટલે કે ગયા વર્ષે જો 100 હીરા વેચાયા હતા, તો આ વખતે 350 વેચાયા છે. દિવાળી દરમિયાન હીરાના વેચાણમાં 47%નો વધારો થયો છે, એટલે કે ગયા વર્ષની સરખામણીએ આ વખતે 1.47 ગણા હીરા વેચાયા છે.
કંપનીના જણાવ્યા મુજબ, કુદરતી હીરાનું વેચાણ છેલ્લા 8 વર્ષમાં બીજા ક્રમે સૌથી વધુ રહ્યું છે. બીજી તરફ, લેબમાં તૈયાર થતા હીરાનું બજાર પણ ઝડપથી વધી રહ્યું છે.