દિલ્હીના વેપારી સંગઠન ચેમ્બર ઓફ ટ્રેડ એન્ડ ઇન્ડસ્ટ્રી (CTI)એ કોંગ્રેસ નેતા રાહુલ ગાંધીને પત્ર લખીને 1 નવેમ્બરે રામલીલા મેદાનમાં યોજાનારી INDIA બ્લોકની રેલી મુલતવી રાખવા વિનંતી કરી છે. સંગઠનનું કહેવું છે કે આ રેલી દિવાળીના ધમધમતા વેપારી સીઝનમાં યોજાશે, જેના કારણે દિલ્હીના બજારોમાં અવરજવર ઠપ થઈ શકે છે અને કરોડો રૂપિયાનું નુકસાન થવાની શક્યતા છે.
CTIના ચેરમેન બૃજેશ ગોયલે શનિવારે રાહુલ ગાંધીને લખેલા પત્રમાં જણાવ્યું છે કે રામલીલા મેદાનની આસપાસ 5 કિલોમીટરના વિસ્તારમાં ચાંદની ચોક, સદર બજાર, ચાવડી બજાર, ખારી બાવલી, કાશ્મીરી ગેટ, નયા બજાર, દરિબા, અજમેરી ગેટ સહિત 20થી વધુ મોટા હોલસેલ અને રિટેલ બજારો આવેલા છે. આ બજારોમાંથી સમગ્ર દેશમાં માલ પહોંચે છે. રેલીના કારણે ટ્રાફિક ડાયવર્ઝન, મેટ્રો સ્ટેશન બંધ અને બેરિકેડિંગ થાય તો આ બજારોની પ્રવૃત્તિ પર ગંભીર અસર પડશે.
વેપારીઓએ જણાવ્યું છે કે ધનતેરસ, દિવાળી અને ભાઈબીજ દરમિયાન દિલ્હીમાં આશરે 25 હજાર કરોડ રૂપિયાનો વેપાર થાય છે. ગયા વર્ષે 2025માં દિવાળી પર આ બજારોમાં 75,000 કરોડ રૂપિયાનું વેચાણ થયું હતું. CTIનો અંદાજ છે કે 1 નવેમ્બરની રેલીને કારણે લગભગ 10 હજાર કરોડ રૂપિયાનો વેપાર પ્રભાવિત થઈ શકે છે. સંગઠને દાવો કર્યો છે કે ઓક્ટોબરમાં અગાઉ યોજાયેલી રેલીઓ અને રસ્તા બંધ થવાને કારણે દિલ્હીના વેપારીઓને અંદાજે 3 હજાર કરોડ રૂપિયાનું નુકસાન થઈ ચૂક્યું છે.
બૃજેશ ગોયલે પત્રમાં કહ્યું છે કે ભાઈબીજ 10 નવેમ્બરે છે, તેથી રેલી 10 નવેમ્બર પછી યોજવી જોઈએ. તેમણે રાહુલ ગાંધીને વિનંતી કરી છે કે તહેવારી સીઝન દરમિયાન વેપારીઓ અને ખરીદદારોને થતી મુશ્કેલી ધ્યાનમાં રાખીને રેલી મુલતવી રાખવામાં આવે.
ઉલ્લેખનીય છે કે INDIA બ્લોકે 6થી 13 ઓક્ટોબરની વચ્ચે દિલ્હીમાં આઠ વખત વિરોધ પ્રદર્શન કર્યું હતું. હવે 1 નવેમ્બરે SIR અને જ્ઞાનેશ કુમારના મુદ્દે રામલીલા મેદાનમાં રેલીની જાહેરાત કરવામાં આવી છે. વેપારીઓની ચિંતા છે કે આ રેલીની અસર દિવાળીની ખરીદી પર પડશે.
દિલ્હીના જૂના વિસ્તારમાં રામલીલા મેદાનથી જૂની દિલ્હી સુધી એક લાખથી વધુ દુકાનો હોવાનો વેપારીઓનો દાવો છે. માત્ર ચાંદની ચોકમાં 75,000થી વધુ દુકાનો છે, જ્યારે સદર બજારમાં 15,000થી 40,000 દુકાનો છે અને ત્યાં રોજ 50,000થી 70,000 લોકો આવે છે. નવી દિલ્હી અને જૂની દિલ્હી રેલવે સ્ટેશન પણ નજીક હોવાથી બહારથી આવતા લાખો ખરીદદારોને પણ અસર થશે.