મુખ્ય ચૂંટણી કમિશનર જ્ઞાનેશ કુમાર વિરુદ્ધ કોકરોચ જનતા પાર્ટી અને AISA દ્વારા 10 ઓક્ટોબરે દિલ્હીના જંતર-મંતર ખાતે આયોજિત વિરોધ પ્રદર્શનને ધ્યાનમાં રાખીને દિલ્હી વહીવટી તંત્ર અને પોલીસે શહેરમાં વ્યાપક સુરક્ષા બંદોબસ્ત કર્યો છે. દિલ્હી પોલીસે ભારતીય નાગરિક સુરક્ષા સંહિતાની કલમ 163 હેઠળ જાહેર મનાઈહુકમનો હવાલો આપીને આ પ્રદર્શન માટે સત્તાવાર પરવાનગી આપવાનો ઇનકાર કર્યો છે.
ભીડની હિલચાલ અટકાવવા માટે દિલ્હી-એનસીઆરમાં રેલવે, મેટ્રો, કેબ, હોટલ બુકિંગથી લઈને દારૂના વેચાણ સુધીના નિયંત્રણો લાદવામાં આવ્યા છે.
10 કલાક ટ્રેનો રદ
શનિવાર, 10 ઓક્ટોબરે સવારે 4:00 વાગ્યાથી બપોરે 2:00 વાગ્યા સુધી નવી દિલ્હી (NDLS) અને હઝરત નિઝામુદ્દીન સ્ટેશને આવતી-જતી તમામ ટ્રેનો રદ રહેશે. 9 ઓક્ટોબરે બપોરે 2:00 વાગ્યા પછી ઉપડતી સંબંધિત ટ્રેનોને સોર્સ પરથી જ રદ કરવામાં આવી છે. પશ્ચિમ બંગાળથી ઉપડતી 12301 હાવડા-નવી દિલ્હી રાજધાની એક્સપ્રેસ અને 12313 શિયાલદહ-નવી દિલ્હી રાજધાની એક્સપ્રેસ પણ રદ કરાઈ છે.
મેટ્રો સ્ટેશનો બંધ
દિલ્હી પોલીસે DMRC ને પત્ર લખીને 57 મેટ્રો સ્ટેશનોના પ્રવેશ-નિકાસ દરવાજા 9 ઓક્ટોબર રાત્રે 9:00 વાગ્યાથી 10 ઓક્ટોબર સ્થિતિ સામાન્ય થાય ત્યાં સુધી બંધ રાખવા અને આ સ્ટેશનો પર ટ્રેનોની આવૃત્તિ ઘટાડવા વિનંતી કરી છે.
CAPFની 221 કંપનીઓ તૈનાત
ગૃહ મંત્રાલયે 8 થી 12 ઓક્ટોબર સુધી દિલ્હી પોલીસને સહાય માટે CAPFની 221 કંપનીઓ ફાળવી છે, જેમાં અંદાજે 23,000 જવાનો સામેલ છે. સુરક્ષા બંદોબસ્તમાં 5 ઓલ-વુમન પેરામિલીટરી કંપનીઓ પણ સામેલ રહેશે. આ માટે CRPFની કંપનીઓને જમ્મુ અને કાશ્મીર, પશ્ચિમ બંગાળ અને છત્તીસગઢથી દિલ્હી બોલાવવામાં આવી છે.
સ્ટેડિયમોમાં અસ્થાયી જેલ
પ્રદર્શન દરમિયાન અટકાયતમાં લેવાયેલા લોકોને રાખવા માટે વિવિધ જિલ્લાઓમાં અંદાજે 10 ડિટેન્શન સેન્ટરો તૈયાર કરાઈ રહ્યા છે. બવાના ખાતેના રાજીવ ગાંધી સ્ટેડિયમ અને છત્રસાલ સ્ટેડિયમ સહિતની સરકારી સુવિધાઓને અટકાયત કેન્દ્રો તરીકે સજ્જ કરાઈ છે. નરેલા, પૂર્વ દિલ્હી અને ઉત્તર-પશ્ચિમ દિલ્હીમાં પણ આવા અસ્થાયી કેન્દ્રો ઊભા કરાયા છે.
દિલ્હી બોર્ડર પર કડક ચેકિંગ
દિલ્હીના તમામ પ્રવેશ બિંદુઓ પર પોલીસે હાઈ-એલર્ટ જાહેર કરીને તકેદારી વધારી છે. બહારના રાજ્યોમાંથી ટોળાંઓને ભેગા કરવાના ઇરાદે પ્રવેશવાનો પ્રયાસ કરનાર શંકાસ્પદ વ્યક્તિઓને સરહદ પર જ અટકાવીને કસ્ટડીમાં લેવામાં આવશે.
દારૂની દુકાનો બંધ
દિલ્હી એક્સાઇઝ વિભાગે પોલીસ ઇનપુટ્સના આધારે 9 અને 10 ઓક્ટોબરના રોજ શહેરની તમામ દારૂની દુકાનો બંધ રાખવાનો સત્તાવાર આદેશ કર્યો છે.
ઇન્ટરનેટ સેવાઓ સ્થગિત કરવાની તૈયારી
અટકાયત કરાયેલા લોકોને જે વિસ્તારોમાં રાખવામાં આવ્યા છે ત્યાં ભીડ એકઠી ન થાય તે માટે ઇન્ટરનેટ સેવાઓ પર પ્રતિબંધ મુકાઈ શકે છે. સુરક્ષાની સ્થિતિ મુજબ આ પ્રતિબંધો નવી દિલ્હી અને સેન્ટ્રલ દિલ્હીના કેટલાક ભાગોમાં પણ લંબાવી શકાય છે.
મીડિયાકર્મીઓ માટે વેલિડ આઈડી કાર્ડ ફરજિયાત
પોલીસે તમામ મીડિયા સંસ્થાઓને વિનંતી કરી છે કે પ્રદર્શનનું કવરેજ કરતા તમામ પત્રકારો અને કેમેરામેન બેરિકેડ્સ અને સંવેદનશીલ વિસ્તારોમાં પ્રવેશ કરતી વખતે તેમના વેલિડ આઈડી કાર્ડ સાથે રાખે.