દિલ્હી પોલીસે કોકરોચ જનતા પાર્ટી (CJP)ના અભિજિત દીપકેની અટકાયત અંગે પ્રેસ કોન્ફરન્સ યોજીને સ્પષ્ટતા કરી છે. DCP PRO નેહા યાદવે જણાવ્યું કે, CJPને અગાઉ શરતો સાથે પ્રદર્શનની મંજૂરી આપવામાં આવી હતી, પરંતુ તે શરતોનું પાલન ન થતા આ વખતે પરવાનગી આપવામાં આવી ન હતી.
પોલીસે જણાવ્યું કે, દીપકેના દાદીના અવસાનની જાણ થતાં જ તેમને ઘરે જવા માટે મદદની ઓફર કરવામાં આવી હતી. પોલીસે એક વીડિયો પણ જાહેર કર્યો છે, જેમાં પોલીસકર્મી દીપકેને કહે છે કે, 'દાદીનું નિધન થયું હોવાથી જો તમારે જવું હોય તો બસ, વિમાન, ટ્રેન કે અન્ય કોઈ માધ્યમથી મુસાફરીની વ્યવસ્થા કરવામાં આવી શકાય.' પોલીસે તેમને પિતા સાથે વાત કરવા અંગે પણ પૂછ્યું હતું, જેના જવાબમાં દીપકેએ કહ્યું કે, તે આ સમયે પિતા સાથે વાત કરી શકે તેમ નથી.
દીપકેએ સોશિયલ મીડિયા પર કહ્યું કે, 'CJPનું પ્રદર્શન યથાવત રહેશે.' તેમણે સ્પષ્ટ કર્યું કે, 'અમે કોઈ એવો બોન્ડ સાઈન નથી કર્યો કે જેમાં અમને પ્રદર્શન કરવાથી રોકવાની શરત હોય.' તેમણે કહ્યું કે તેઓ ફરીથી રસ્તા પર ઉતરશે.
રવિવારે (11 ઓક્ટોબરે) અભિજિત દીપકે, આશુતોષ રાંકા અને સૌરવ દાસને દિલ્હી કેન્ટ સ્થિત કાર્યકારી મેજિસ્ટ્રેટની કોર્ટમાં હાજર કરવામાં આવ્યા હતા. બાદમાં ત્રણેયને છોડી મૂકવામાં આવ્યા હતા. શાંતિ અને સારો વ્યવહાર રાખવાની શરત સાથે રૂ.50,000ના જામીન બોન્ડ પર તેમને મુક્ત કરવામાં આવ્યા હતા.