દિલ્હીમાં ગુરુવારે મોડી રાત્રે સંસદ માર્ગ પોલીસ સ્ટેશન બહાર NSUIના કાર્યકરોએ મોટાપાયે પ્રદર્શન કર્યું. મહિલા સભ્યો સાથે થયેલી કથિત મારપીટના કેસમાં FIR નોંધવાની માંગ સાથે NSUI અધ્યક્ષ વિનોદ જાખડ સહિત અનેક કાર્યકરોની અટકાયત કરવામાં આવી હોવાનો સંગઠનનો દાવો છે.
NSUIના જણાવ્યા અનુસાર, તેમના કાર્યકરો દિલ્હી પોલીસની એક મહિલા અધિકારી સામે મહિલા સભ્યો સાથે મારપીટ કરવાનો આરોપ લગાવીને FIR નોંધાવવા માંગતા હતા. સંગઠનનું કહેવું છે કે બુધવારે એડિશનલ DCP સહિતના વરિષ્ઠ અધિકારીઓનો સંપર્ક કરવા છતાં FIR નોંધવામાં આવી ન હતી. આથી મજબૂર થઈને કાર્યકરોએ પોલીસ સ્ટેશન બહાર ધરણા પર બેસવું પડ્યું હતું. NSUIનો આરોપ છે કે પોલીસે ફરિયાદ સ્વીકારવાને બદલે પ્રદર્શનકારીઓ સામે જ કાર્યવાહી કરી હતી.
NSUI અધ્યક્ષ વિનોદ જાખડે આરોપ લગાવ્યો કે પ્રદર્શન દરમિયાન મહિલા કાર્યકરો સાથે મારપીટ કરવામાં આવી હતી અને કેટલીક મહિલાઓને અંધારા રૂમમાં લઈ જઈને બૂટ અને સેન્ડલથી માર મારવામાં આવ્યો હતો. તેમણે સવાલ ઉઠાવ્યો કે શું મહિલા કાર્યકરો માટે ન્યાય માંગવો એ અપરાધ છે? સંગઠન માત્ર FIR નોંધાવવા આવ્યું હતું, પરંતુ પોલીસ અધિકારીઓ તેમની વાત સાંભળવા તૈયાર નહોતા.
સંગઠનના રાષ્ટ્રીય મીડિયા પ્રભારી રવિ પાંડેએ પણ અટકાયતની સખત નિંદા કરી છે અને તાત્કાલિક FIR તથા નિષ્પક્ષ તપાસની માંગ કરી છે. NSUIએ ચેતવણી આપી છે કે જો વહેલી તકે યોગ્ય કાર્યવાહી નહીં કરવામાં આવે તો આંદોલનને વધુ ઉગ્ર બનાવવામાં આવશે.
બીજી બાજુ, કોકરોચ જનતા પાર્ટી (CJP)ના સંસ્થાપક અભિજીત દીપકેએ લોકોને ગુરુવારે સાંજે 5 વાગ્યે કનોટ પ્લેસના સેન્ટ્રલ પાર્ક ખાતે તિરંગો લઈને પહોંચવા અપીલ કરી છે. આ માર્ચ મુખ્ય ચૂંટણી કમિશનર જ્ઞાનેશ કુમારને હટાવવાની માંગ અને મતદાર યાદીના વિશેષ ઘનિષ્ઠ પુનઃનિરીક્ષણ (SIR)માં થયેલી કથિત અનિયમિતતાઓના વિરોધમાં બોલાવવામાં આવી છે.
દિલ્હી પોલીસે કનોટ પ્લેસ તથા આસપાસના વિસ્તારોમાં પ્રતિબંધો લાગુ હોવાનું જણાવીને લોકોને આ માર્ચથી દૂર રહેવા અપીલ કરી છે. ભારતીય નાગરિક સુરક્ષા સંહિતા (BNSS)ની કલમ 163 હેઠળ પ્રતિબંધો અમલમાં છે. NDMC દ્વારા પણ વહીવટી કારણોસર 16 અને 17 ઓક્ટોબરે સેન્ટ્રલ પાર્ક બંધ રાખવાનો આદેશ જારી કરવામાં આવ્યો છે.
અભિજીત દીપકેએ ગુરુવારે મોડી રાત્રે એક પ્રેસ કોન્ફરન્સમાં દાવો કર્યો કે પોલીસ તેમને રાત્રે અથવા આજે સવારે ગમે ત્યારે અટકાયતમાં લઈ શકે છે, પરંતુ તેઓ તિરંગો લહેરાવવા માટે જેલ જવા પણ તૈયાર છે. તેમનો આરોપ છે કે પોલીસ અને ગુપ્તચર એજન્સીઓ સતત તેમના પર નજર રાખી રહી છે. તેમણે કહ્યું કે તેમની મુખ્ય માંગ માત્ર જ્ઞાનેશ કુમારની જગ્યાએ નિષ્પક્ષ વ્યક્તિની નિયુક્તિ કરવાની છે, સરકાર બદલવાની નથી. તેમણે પોતાના સહયોગીઓ સૌરવ દાસ અને આશુતોષ રાંકાની ધરપકડનો પણ ઉલ્લેખ કર્યો હતો.