નવી દિલ્હી: દિલ્હીના કિલોકરી ગામમાં 54 વર્ષીય મણિપુરી સંગીતકાર ચોંગથમ વિક્રમ સિંહની હત્યાના કેસમાં પોલીસે 7 પુખ્ત આરોપી અને 1 સગીરની ધરપકડ કરી છે. આ ઘટના બાદ રાજધાનીમાં પૂર્વોત્તરના લોકોની સુરક્ષા અંગે ગંભીર સવાલો ઉઠ્યા છે.
ઘટના રવિવારે રાત્રે આશરે 11:30 વાગ્યાની છે. વિક્રમ સિંહ કચરો ફેંકવા નીચે ગયા હતા ત્યારે તેમણે બહાર હોબાળો કરી રહેલા કેટલાક યુવકોને અવાજ ઓછો કરવા જણાવ્યું હતું. આથી ઉશ્કેરાયેલા આરોપીઓ તેમનો પીછો કરીને ત્રીજા માળ સુધી ગયા અને તેમના ઘરમાં ઘૂસી હુમલો કર્યો હતો. હુમલામાં ગંભીર ઇજા પામેલા વિક્રમ સિંહને હોસ્પિટલમાં દાખલ કરવામાં આવ્યા હતા, જ્યાં સારવાર દરમિયાન તેમણે અવસાન પામ્યા.
આ ઘટનાની જાણ થતાં જ રાજકીય નેતાઓએ પ્રતિક્રિયા આપી છે. લોકસભામાં નેતા પ્રતિપક્ષ રાહુલ ગાંધીએ ગૃહ મંત્રાલયને સવાલ કર્યો છે કે દિલ્હીમાં પૂર્વોત્તરના લોકો વિરુદ્ધ વધતી અરાજકતા રોકવા માટે શું કરવામાં આવી રહ્યું છે. તેમણે ત્વરિત તપાસ અને કડક ન્યાયની માંગ કરી છે. મણિપુરના પૂર્વ મુખ્યમંત્રી એન. બિરેન સિંહે પણ દુઃખ વ્યક્ત કરીને દોષિતો સામે કડક કાર્યવાહીની માંગણી કરી છે.
દિલ્હી પોલીસે આ કેસમાં ભારતીય ન્યાય સંહિતાની યોગ્ય કલમો હેઠળ ગુનો નોંધ્યો છે અને આરોપીઓની ધરપકડ કરી છે. હાલમાં તપાસ ચાલુ છે.