મધ્ય દિલ્હીના દેશબંધુ ગુપ્તા રોડ પોલીસ સ્ટેશન વિસ્તારમાં આવેલી શિદીપુરા પોલીસ ચોકી વિસ્તારમાં 7 વર્ષની બાળકી સાથે દુષ્કર્મનો મામલો સામે આવ્યો છે. પોલીસે તાત્કાલિક કાર્યવાહી કરતા આરોપીની ધરપકડ કરી છે અને તેને મેડિકલ ચેકઅપ માટે મોકલી આપ્યો છે.
પોલીસના જણાવ્યા મુજબ, સોમવારે સાંજે સ્થાનિક લોકો બાળકી અને તેના પરિવારજનો સાથે શિદીપુરા પોલીસ ચોકી ખાતે પહોંચ્યા હતા. લોકોએ એક શખ્સને પકડીને પોલીસ ચોકીએ લાવીને તેની સામે કાયદેસરની કાર્યવાહી કરવાની માંગ કરી હતી. ઘટનાની ગંભીરતાને પગલે પોલીસે આરોપીને કસ્ટડીમાં લીધો છે.
આરોપીની ઓળખ 34 વર્ષીય અંકિત તરીકે થઈ છે, જે દિલ્હીના કિશનગંજ વિસ્તારનો રહેવાસી છે. સ્થાનિક લોકોએ પોલીસને જણાવ્યું કે કિશનગંજ વિસ્તારમાં બાળકી સાથે યૌન શોષણ કરતા આરોપીને ઝડપી પાડવામાં આવ્યો હતો. ત્યારબાદ તેને પકડીને પોલીસ ચોકી ખાતે લાવવામાં આવ્યો હતો. પોલીસે આરોપીની પૂછપરછ શરૂ કરી છે અને તેને મેડિકલ તપાસ માટે મોકલવામાં આવ્યો છે.
મામલાની ગંભીરતાને ધ્યાનમાં રાખીને પોલીસે બાળકીની પણ તાત્કાલિક મેડિકલ તપાસ કરાવી છે. પોલીસની ટીમે ઘટનાસ્થળનું નિરીક્ષણ કરી તપાસ શરૂ કરી છે. પોલીસના જણાવ્યા મુજબ, આરોપી સામે POCSO એક્ટ તેમજ BNSની સંબંધિત કલમો હેઠળ FIR નોંધવાની કાર્યવાહી હાથ ધરવામાં આવી રહી છે. બાળકીના પરિવારજનો અને ઘટનાની જાણકારી ધરાવતા અન્ય લોકોના નિવેદનો પણ લેવામાં આવી રહ્યા છે.
ઘટનાની જાણકારી ફેલાતા વિસ્તારમાં તણાવની સ્થિતિ સર્જાઈ હતી. મોટી સંખ્યામાં સ્થાનિક લોકો પોલીસ ચોકી ખાતે એકત્ર થયા હતા અને આરોપી સામે કડક કાર્યવાહી કરવાની માંગ સાથે નારેબાજી કરી હતી. સ્થિતિને ધ્યાનમાં રાખીને પોલીસનો વધારાનો કાફલો તૈનાત કરવામાં આવ્યો હતો. સેન્ટ્રલ જિલ્લાના વરિષ્ઠ પોલીસ અધિકારીઓ પણ સ્થળ પર પહોંચ્યા હતા અને લોકોને સમજાવીને શાંત કર્યા હતા. હાલ સ્થિતિ નિયંત્રણમાં હોવાનું પોલીસનું કહેવું છે, જોકે તકેદારીના ભાગરૂપે વિસ્તારમાં પોલીસ બંદોબસ્ત યથાવત રાખવામાં આવ્યો છે. કેસમાં આગળની કાર્યવાહી મેડિકલ રિપોર્ટ અને તપાસમાં સામે આવતા તથ્યોના આધારે કરવામાં આવશે.